Сииттэбитигэр нэһилиэк уопсай мунньаҕа буолан ааста. Мунньахха Кэбээйи улууһун куратора Павел Владимирович Иванов сыл аҥардааҕы үлэтин-хамнаһын туһунан отчуоттаата. Иван Иванович Левин улууспутугар бара турар үлэлэри, былааннары, тыа хаһаайыстыбатын үлэтин-хамнаһын, от хаамыытын, онтон да атын боппуруостары билиһиннэрдэ, ону кытта нэһилиэкпитигэр турар сытыы боппуруостары кытта билсистэ.
Биир дойдулаахпыт, тыа хаһаайыстыбатын министерствотыттан Василий Бессонов, республикаҕа билинҥи туругунан бара турар үлэлэр тустарынан кэпсээтэ. Төбө, үүт харчылара хаһан хамсыыра биллибэтин, өрөспүүбүлүкэҕэ харчы түһэрин күүтэллэрин биллэрдэ. Ханна да буоларын курдук балаһыанньа ыараханын, харчы билигин барыта быстах байыаннай дьайыыга Россия үрдүнэн бара турарын аһаҕастык эттилэр.
Бу күннэргэ Кэбээйибит улууһун доруобуйатын харыстабылыгар Иван Егорович Эверстов — саҥа салайааччы ананан кэлэн үлэтин саҕалаабытын биһирии көрдүбүт. Инники өттүгэр бэйэтэ туспа былааннардааҕын, саҥа көрүүлэрдээҕин бар дьоҥҥо билиһиннэрдэ.
Саха сиринээҕи массыына суолларын управлениетын туһаныыга салаатын суол хаһаайыстыбатын бастыҥ эксперэ Данил Александрович Бекенев Синньигэс үрэх муостатын, Арыылаах суолун боппуруоһун көрө-истэ бэрэстэбиитэл кэлэн үлэлээн барда. Олохтоох дьаһалта баһылыга Семён Тимофеев туруорсубут бары боппуруостарыгар, суруйбут суруктарыгар элбэх хамсаныы, болҕомто ууруллан, улуус баһылыга Иван Левин, улууспут куратора Павел Иванов күүс-көмө буоланнар, биир сүбэннэн үлэлии-хамсыы сылдьалларын иһиттибит, көрдүбүт. Мунньах бүтүүтэ нэһилиэкпит олохтоохторугар «аҕалыҥ, оҥоруҥ» диэн боппуруоһу көтөхпөккө, ким туох кыахтааҕынан күүс-көмө буолан, сомоҕолоһон, үлэлээҥ-хамсааҥ диэн бэйэлэрин ыҥырыыларын тириэртилэр.
Ону тэҥэ, улууспутугар үрдүк таһымҥа буолан ааспыт Олоҥхо ыһыаҕар бары сүүрбүт-көппүт олохтоохторго, баһылыктарбытыгар Семён Тимофеевка, Пётр Степановка улахан махталларын, эҕэрдэлэрин тириэртилэр.
Ити курдук республикабыт, улууспут сонунун, ону тэҥэ атах тэпсэн олорон сэһэргэһэн, мунньахха кэлбит дьон астынан, махтанан тарҕастылар.
Марианна Сивцева