Ыам ыйын 20 күнүттэн саҕалаан И.Е. Левин аатынан Танара орто оскуолатыгар үөрэх дьылын түмүктүүр тэрээһиннэр буолан аастылар:
“Чыпчаал — 2026”. Бу сыллата оскуола үрдүнэн ыытыллар үгэс буолбут тэрээһиҥҥэ үөрэх бастыҥнарын, биирдиилээн предмеккэ ситиһиилээх, общественнай олоххо көхтөөх оҕолору, төрөппүттэри бэлиэтээтилэр. Олортон саамай чаҕылхай үөрэнээччилэринэн буоллулар:
«Бастыҥ үөрэнээччи — 2026» — Лазарева Ангелина, 3 кыл.
«Бастыҥ үөрэнээччи — 2026» — Андросова Айыллаана, 8 кыл.
«Бастыҥ үөрэнээччи — 2026» — Егорова Алена, 9 “б” кыл.
“Бүтэһик чуораан — 2026”. Быйыл оскуолабытын 12 оҕо бүтэрдэ. Бастакы учууталлара — СӨ үөрэҕириитин туйгуна Иванова М.И., кылаас салайааччыларынан М.П. Кычкина, А.Д. Кычкина араас сылларга үлэлээбиттэр. Бастыҥ үөрэнээччилэр, НПК кыттыылаахтара: Иванова Дана, Яковлева Нарыйа, Николаев Олег. Бастыҥ хапсаҕайдьыттар: Куличкин Марк, Егоров Ваня (Бүлүү, Дьөккөн), бастыҥ спортменнар, олоххо көхтөөхтөр, бастыҥнар хамсааһыннарын чулуулара : Афанасьев Эдуард, Гоголев Семен, Борисова Айыына, Николаева Нарыйа, Алексеева Дайаана, Николаев Олег, Павлова Виолетта, Андросов Айсен бэлиэтэннилэр.
Выпускник – шоу — Танарафильм. Бу күн 10 кылаастар тэрийиилэринэн олус чаҕылхай “Выпускник – шоу” буолла. 5 – 9 кылааска дылы үөрэнээччилэр араас киинэлэртэн быһа тардан көрдөрдүлэр, хас биирдии оскуоланы бүтэрээччигэ кылаастар анал эҕэрдэлэрин анаатылар. Ол курдук 5 кылаастар: “Люди в черном”, 6 кыл. “Танцор диско”,7 кыл. “Один дома”, 8 кыл. “Великолепный век”, 9 ”а” кыл. “Титаник”, 9”б” кыл. “Карате — пацан”.
Бэс ыйын 1 күнэ — Оҕо көмүскэлин күнүн көрсө самаан сайыны уруйдаан, үөрэх сылын түмүктүүр «Күн оҕото-оҕо ыһыаҕа» оскуолабытыгар бастакы улахан тэрээһин буолла. Бу манна оҕолор, төрөппүттэр, кылаас салайааччылара бука бары түмсэн сэлэлээн түһүлгэҕэ киирдилэр. Төрүт үгэһи тутуһан арыылаах алаадьынан сири аһаттылар, оһуохайга көхтөөхтүк киирэн түһүлгэни төрүттээтилэр. Улууспутугар ыытыллар Олоҥхо ыһыаҕар анаммыт оһуохайы төрүт култуура учуутала С.Т. Белолюбскайа таһаарда, киниэхэ 10 кылаас үөрэнээччилэрэ Г. Анита, А. Анита кынат буоллулар.
“Олоҥхо ыһыаҕа — 2026” ыһыаҕыгар анаан кылаастар маанылаах сандалы аһын тэрийиигэ күрэхтэстилэр. I-кы истиэпэннээх грамотанан уопсайа 5 кылаас наҕараадаланна, II-с истиэпэннээх грамотаны уопсайа 3 кылаас ылла, III истиэпэннээх грамотанан уопсайа 3 кылаас наҕараадаланан үөрүүлэрэ үксээтэ.
«Күн оҕото-оҕо ыһыаҕа» бырааһынньыктааҕы кэнсиэригэр кылаастар сахалыы фольклор нүөмэрдэрин бэлэмнээн кытыннылар. Норуот ырыаларын, үҥкүүлэрин,чабырҕаҕы толордулар. 7 кылаастар (кыл. салайааччы Ксенофонтова С.Н.) И.А. Николаев – Куоҕас Уйбаан олоҥхотуттан быһа тардан аахтылар.
Кыргыттарга анаан “Уһун суһуох”, “Саха маанылаах таҥаһа”куонкурустар ыытылыннылар. Ол кэннэ саха төрүт оонньууларыгар күрэхтэһии буолла. Күрэстэри Саха төрүт көрүҥнэригэр успуорт оскуола тренердэрэ ыыттылар. Төһө да сөрүүн күн буоллар элбэх оҕо, төрөппүт көхтөөхтүк кыттан, үөрэн-көтөн тарҕастылар. Оҕолорбут сайыҥҥы сынньалаҥы туһалаахтык атаарыахтара, оскуоланы бүтэрээччилэрбит эксээмэннэрин туттаран ситии-хотуу аттестатын ылан сөбүлүүр үөрэхтэригэр туттарсан киирдиннэр диэн баҕа санаабытын аныы хаалабыт.
Саҥа 2026-2027 үөрэх дьылыгар көрсүөххэ диэри!
Новикова К.Е. библиотекарь, Рожина Е.А., дириэктэри иитии үлэтигэр сүбэһитэ.