Быйылгы 2026 сылга улуус үрдүнэн уопсайа 9930 туонна от бэлэмнэнэрэ былааннанар. От ыйын 27 күнүнээҕи иһитиннэрииннэн, үрдүк сирдэргэ 195 оттуур биригээдэ ходуһаҕа киирдэ. Олор истэригэр 8 толору механизированнай, 78 механизированнай аӈардаах уонна 109 илииннэн оттуур биригээдэлэр бааллар. Уопсайа 589 киһи от үлэтигэр сылдьар.
Ол эрэн быйыл сайын отчуттарга улахан мэһэй үөскээтэ, ардахтар күүскэ түһэн, өрүс уутун таһыма үрдээн от үлэтигэр күүстээх харгыстары оӈордо. Охсуллар ходуһа 30%-на күн бүгүн ууга сытар. Чуолаан Кэбээйи, Куокуй, Сииттэ нэһилиэктэрэ сүрүн ходуһаларыгар киирэ иликтэр. Былырыын баччаларга 1129 туонна от турбут эбит буоллаҕына, быйыл охсуу иэнинэн хаалыы бэлиэтэннэ: 807 га эрэ охсулунна (ааспыт сайын бу кэмҥэ 1663 га этэ).
Маны сэргэ, быйыл сэлээркэ боппуруоһа хаһааӈӈытааҕар да сытыытык турар. Кэбээйи улууһун тыа хаһаайыстыбатын салайааччыта Гаврил Селляхов иһитиннэрбитинэн, от ыйдааҕы уматыгы түҥэтии барыта тыырыллан, туһааннаах хаһаайыстыбаларга тириэрдиллибит.
Төһө да ыарахан күннэр-дьыллар турдаллар, тыа сирин үлэһит дьоно санааларын түһэрбэттэр, от үлэтэ таһаарыылаахтык салҕанан барар.
Нэһилиэктэргэ быйылгы сайын туһунан «Дабаан» хаһыат уопсастыбаннай кэрэспэндьиэннэрэ иһитиннэрэллэр:
Ксения Новикова: «Бары күүһү окко! Быйыл Мукучуга от ыйыгар 3 нэдиэлэни быһа быыстала суох ардаан, от үлэтэ ый 24 күнүттэн саҕаламмыта. Бастакы хотуур ото бэҕэһээ, от ыйын 30 күнүгэр, дьэ тиэргэҥҥэ кэллэ. Бу күннэргэ сүөһү, сылгы ииттэр хаһаайыстыбалар бары күүһү-кыаҕы от үлэтигэр ууран күүскэ үлэлииллэр. Халлаан туран биэрдэр ханнык».
Петр Ноговицын: «Арыктаах нэһилиэгэр Ноговицын Алексей Николаевич Таала диэн ходуһаҕа окко киирдэ. Уопсайа 140 бугулу ыллыбыт диэтэ. Оҕолоро, сиэннэрэ окко олус үчүгэйдик кыһамньылаахтык үлэлииллэр эбит. Онон кыстыыр отторун оттуу үлэлии-хамсыы сылдьаллар. Сиэннэрэ Алгыс Сидоров, 8 кылаас үөрэнээччитэ, окко от мунньар үлэтигэр дьонугар сүрүн күүс-көмө буолар. Ноговицыттар дьиэ кэргэттэрэ уһаайбаларыгар олус улахан оту кээстилэр. Анна Семеновна хаһаайыстыбатыгар элбэх сүөһунү иитэр, тыа хаһаайыстыбатынан утумнаахтык дьарыктаналлар».
Кэбээйи сирин үлэһит дьоно хаһан да халлаан туругун иннигэр кыахтарын биэрбэттэр. Саха киһитин үйэлээх үгэһинэн, оҕотуттан эмэнигэр тиийэ бары биир киһи курдук окко турунан, кырыымчык да кэмҥэ кыстыгы этэҥҥэ туоруур туһуттан күүстээх үлэ салҕанар. Отчуттар билигин саамай сүрүн баҕа санааларынан халлаан туруга көнөн, кураан күннэр туран биэрэллэрэ буоллар диэн.
Светлана Оконешникова, Татьяна Левина