Сирдээҕи олоххо туох дьоҕурдааххын бэйэҥ искэр туппакка, дьоҥҥо-сэргэҕэ такайан, күрэстэргэ кыттан, нэһилиэгиҥ, улууһун аатын көмүскүүр буоллаххына ордук туһалаах.
Тыайаҕа тылынан уус-уран айымньыны толорууну баһылаан, оскуолаҕа, нэһилиэккэ оҕолору, ыччаты уһуйбут биир умнуллубакка, улаханнык ытыктана ааттанар киһибитинэн Алексей Семенович Николаев буолар. Кини Үөһээ Бүлүүттэн төрүттээх, эдэр сылдьан П.А.Ойуунускай аатынан Саха академическай театрыгар рабочайынан үлэлии сылдьан, артыыстары солбуйара, гастролларга кытары сылдьыһара эбит.
Тыайаҕа олохсуйан баран концертарга солбуллубат тойуксут, чабырҕахсыт, оһуохайдьыт, сценкалар, спектакллар артыыстара буолара. Биир ураты дьоҕура — алгысчыт, онон, ыһыахтар амарах санаалаах, эйэҕэс майгылаах, үтүөнү эрэ түстүүр айылгылаах Алексей Николаевич алгыһынан саҕаланаллара. Алексей Николаевич фольклор күрэстэригэр элбэхтик кыттара, ситиһии көтөллөөх кэлэрин үгүс наҕараадалара туоһулууллар
Yтүө киһибит аатын үйэтитэр «Тойук тоҕойо, норуот ырыата, оһуохай түһүлгэтэ» Олоҥхо ыһыаҕын көрсө, «Түмсүү» сынньалаҥ киинигэр бэрт сэргэх тэрээһин ааста. Кыттааччы аҕыйах да буоллар, талба талааннарынан төрүт тылбын сүмэтин, ураты дьикти эйгэтинэн бэйэлэрин тойугунан билиһиннэрииттэн саҕалаан, чыыбы-чаабы чабырҕаҕы норуот ырыатынан доҕуһуоллаан, Сунтаар, Бүлүү, Амма оһуохайынан киэргэтэн, дьикти дьүрүскэҥҥэ киирэ сырыттыбыт. Оһуохайы үгүстүк истибэт дьон, Мастаахтан кэлбит ыалдьыппыт Люция Павловна Сметанина биир дойдулаахпыт Кырса Сөдүөт «Биэ Уола Бэйбэлдьин тулаайах» олоҥхотуттан быһа тардан иһитиннэрбитин сэргии, хайгыы иһиттибит.
Төрөөбүт тылбыт, омукпут ураты баайын үйэтитэн илдьэ сылдьар уран тыллаах кыттааччыларбытыттан, Светлана Михайловна Дьяконова тэҥнээҕин булбата, добун кыайыылаах аатын ылыан ылла. Кинини сэргэ, оһуохай арааһын үҥкүүлэппит Дария Алексеевна Гуляева, номоҕой тыллаах-өстөөх Люция Павловна Сметанина, чаҕаарыйатуойар чуор куоластаах Тамара Михайловна Тарасова Алексей Семенович Николаев кыргыттарын, сиэннэрин, аймах-билэ дьонун бэлэхтэрин, көрөөччүлэр хайҕалларын ылан тарҕастылар
Сахабыт ураты көрүҥнэрин симэлиппэккэ илдьэ сылдьыаҕыҥ. Төрөөбүт тылбытын оҕо аймахха сатабыллаахтык тиэрдэн, омукпут сайдар кэскилин түстүүр үлэни тэрийэ туруоҕуҥ.
Екатерина Архипова