Күн үөһэ чэмэлийэ тыган, сандал сааспыт кимэн киирэрэ күүһүрэр. Сир дойду күнүһүн ириэрэр, түүнүн тоҥорор.
Бүгүн, муус устар 17 күнүгэр, Кэбээйи нэһилиэгэр Олоҥхо Ыһыаҕар бэлэмнэнии чэрчитинэн, Саха өрөспүүбүлүкэтин атыыга — эргиэҥҥэ , бырамыысыланнаска палататын тэрийиитинэн, « Ыһыаҕым саргылаах таҥаһа, кэскиллээх киэргэлэ» диэн ааттаах үс хонуктаах быыстапка дьаарбаҥката Култуура сайдыытын киинигэр (сал. Семенова Л. С.) ыһыахтыыр таҥас сап арааһын, киэргэл — симэх сиэдэрэйин, оһуордаах туттар малы — салы, алтан көмүстэн үгэс буолбут сахалыы оҥоһуктары, көрүөхтэн кэрэ сувенирдары, матырыйааллар араас көрүҥнэрин, сахалыы ачыкылары, сылгы сиэлиттэн харысхаллары, дэйбиирдэри уонна да атыны олохтоохтор сүрэхтэрэ сөбүлүүрүн, харахтара таптыырын атыылаһар кыахтаннылар.
Маны таһынан, биллиилээх норуот маастардарын сатабылларыгар «Магия бисера», «Дьабака», «Халадаай», «Бохо кэһиэччигэ», «Бэйбэрикээн» , алтан симэхтэри оҥорууга уонна сөптөөхтүк аһааһын оскуолатыгар маастар-кылаастар үөрэхтэрэ саҕаланнылар. Ситиһиилэри баҕарабын. Этэргэ дылы, саха сатаабатаҕа суох.
Венера Лугинова, Кэбээйи