2013 сыллаахха «Саха Өрөспүүбүлүкэтигэр үөрэҕирии эбийиэктэрин тутуу» инвестиционнай бырагырааманан 120 миэстэлээх саҥа таас оскуола Мастаахха үлэҕэ киирбитэ. Быйыл 2023 с. ахсынньы 23 күнүгэр саҥа таас оскуолаҕа кэнчээри ыччаты иитии-үөрэтии 10 сылын бэлиэтиир дьоро күн буолан ааста.
Оскуола үтүө үгэстэриттэн биирдэстэрэ Егоровскай «Утум» бириэмийэни туттарыы буолар. Егоровскай «Утум»бириэмийэҕэ туспа суоллаах-иистээх, араас методиканы баһылаабыт үрдүк таһымнаах учууталлар, үөрэх туйгуннара, спортивнай, литературнай-уус-уран күрэхтэһиилэр, научнай-практическай конференциялар кыайыылаахтара, эппиэтинэстээх, көхтөөх бастыҥ үлэһиттэр, иитии-үөрэтии уопсай дьыалатыгар 100% кыттар, бастыҥ холобуру көрдөрөр төрөппүттэр тиксэллэр.
2023-2024 үөрэх дьылыгар Н.П. Егоров аатынан оскуолабыт 10 сыллаах үлэтин-сайдыытын кэпсиир киэҥ ис хоһоонноох хаартыска-быыстапка, «Педагогическай калейдоскоп» аһаҕас уруоктар, дьарыктар биир нэдиэлэ устата ыытылыннылар. Бу барыта кэнчээри ыччаты үөрэнэр кыһаларынан киэн туттууга, киһилии сиэргэ-майгыга, үөрэххэ, үлэҕэ кынаттаабыта саарбаҕа суох диэн туран, оскуола 10 сыллаах үлэтин, сайдыытын кэпсиир презентацияны көрөллөрүгэр ыҥырдылар. Салгыы оскуола дириэктэрэ Саввинова Анжелика Николаевна, өр кэмҥэ оскуолаҕа дириэктэрдээбит, учуутал Маргарита Прокопьевна Баишева, 2-с Лүүчүн нэһилиэгин баһылыга Юрий Иванович Лепчиков үөрүүлээх бырааһынньыгынан бука барыларын эҕэрдэлээтилэр. Дьэ, бу кэнниттэн хас сылын аайы ыытыллар Н.П. Егоров аатынан «Утум» бириэмийэни туттарыы саҕаланна. «Сыл бастыҥ үөрэнээччитэ» анал ааты 11 кылаас үөрэнээччитэ Виталий Баишев ылла.
«Сыл бастыҥ учууталынан» Яковлева Айталина Ивановна ааттанна, «Сыл бастыҥ үлэһитэ» анал аат Дмитриева Евдокия Антоновнаҕа,
«Сыл бастыҥ төрөппүтэ» Семёнова Анна Алексеевнаҕа туттарылынна.
Түгэнинэн туһанан «Утум»бириэмийэ кыайыылаахтарын итиитик-истиҥник эҕэрдэлиибит. Педагог уонна уһуйааччы сыла түмүктэнэн эрэринэн оскуола бэтэрээннэрин, үлэлии сылдьар үлэһиттэри бэлиэтиир тоҕоостоох кэм үүннэ. Кинилэргэ Мастаах орто оскуолатын кэлэктиибин аатыттан бука барыларыгар эҕэрдэ суругу уонна бэлэҕи үөрдэ-көтүтэ туттардылар. Саҥа оскуолабыт 10 сылыгар анаммыт минньигэс туортары сыанаҕа ытыс тыаһыгар доҕуһуоллатан киллэрдилэр. Ити курдук биир бэлиэ тэрээһин үрдүк таһымҥа ааста.
Тапталлаах оскуолабыт үүнэ, чэчирии, сайдыы киэҥ аартыгынан үөрэнээччилэрин, учууталларын, үлэһиттэрин кытта иннин диэки баран истин!
Сардана Жакипова
