Бүлүү өрүс төрдүгэр алтынньы ый 15 күнүгэр 1956 сыллаахха гаас көстүбүтэ 70 сылыгар анаан ахтыы cуруйдум.
Оччолорго биһиги мэник-тэник чолохоостор этибит эрээри, оччотооҕу оҕолор дойдубутунан киэн туттар үрдүк үөрүү сүрэхпитигэр-быарбытыгар дириҥник иҥмитэ.
Билигин сааһыран олорон доҕорбун, үөлээннээхпин, Николай Ильич Игнатьевы ахтан аһарары наадалааҕынан ааҕабын.
Бүлүү өрүс тамаҕар баар Соһо Хайа (Собо Хайа диэн аатынан биллэр) туһунан «Дабаан» хаһыакка (13— с нүөмэрэ, 25.02.2015 с.) суруйан таһааттара сылдьыбытым.
Бу Соһо Хайаттан Промышленнай бөһүөлэгэр диэри гаас турбатын тардан кылгас кэмҥэ күөх төлөнү туһана сылдьыбыттарын туһунан миэхэ Николай Ильич Игнатьев хаста да кэпсээн турар. Оттон гааска сыһыаннаах араас суруйууларга ол туһунан ахтан аһарыы суох курдук. Тоҕотун билбэтим: билбэттэрэ эбитэ дуу, эбэтэр суолта биэрбэттэрэ эбитэ дуу. Ити Соһо Хайаҕа таас чох эрэ буолбакка гаас эмиэ баарын олохтоохтор кэпсииллэрэ. Ити турбаны скважинаттан тахсар гаас уута уонна да атын элимиэнэ элэҕинэн тохтоппуттар.
Коля — Николай Ильич гааска, Промышленнай бөһүөлэгин газовай электростанциятыгар пенсияҕа тахсыар диэри үлэлээбитин туһунан биир да ахтыыга эмиэ суох. Мин кини туһунан суруйаары ахтыыгын ыыт дии сатаабытым да бэйэтин туһунан кэмчи кэпсээннээх киһи этэ. Мин кинилэри кытары ааспыт үйэ 90-с сылларыттан сирэй көрсөн кэпсэппэтэҕим. Телефонунан «ыаһахтаһарбытын» хайабыт да ыарырҕатара: кини кэлэҕэй, мин истэрбинэн мөлтөхтүн. Ол иһин билиим-көрүүм кэмчи.
Промышленнай бөһүөлэгэ сабыллыбытыгар олохтоохтор ыһыллыбыттара. Николайдаах куоракка, газовиктар бөһүөлэктэригэр квартира ылбыттар этэ. Николай Ильич инбэлиит этэ, олохтон бу соторутааҕыта туораабыта. Кэргэнэ Валентина Михайловна Масаева кэргэнин кэнниттэн өр буолаахтаабатаҕа, бараахтаабыта, эдэриттэн ыарыһах этэ.
Николай Ильич Арҕас бөһүөлэгиттэн чугас, 1948 сыллаахха Дьакыама Унньугаһыгар төрөөбүтэ.
Куокуй алын сүһүөх Кэбээйи орто оскуолаларыгар үөрэммитэ. «Кэбээйи сопхуос «Куокуйдааҕы» салаатыгар үлэлээбитэ. Якутскайга милиция оскуолатыгар үөрэнэн Сангаарга үлэлии сылдьыбыта. Армияҕа ЗабВОҕа Ага станцияҕа сулууспалаабыта. Суоппар буолан идэтинэн үлэлээбитэ, салгыы бырааттыы Монголияҕа командировкаҕа тиийэн сулууспалаабыта. Бараатын кытта Ага станцияҕа байыаннай сыалга туттуллар икки вагоҥҥа тиэллибит матырыйаал эстибитэ. Ол сиэртибэлээх этэ, харабылга турбут саллааттар өлбүттэрэ.
Коля армияттан кэлээт аҕыйах кэмҥэ Куокуйга үлэлээбитэ, онтон Промышленнайга тиийэн газовай электростанцияҕа дизелиһинэн үлэҕэ киирэн пенсияҕа тахсыар диэри эҥкилэ суох таһаарыылаахтык үлэлээбитэ. Кэргэннэммитэ, хас да оҕоломмуттара.
Сорох киһи бу орто дойдуга баарын эрэ тухары, тугу эмэ оҥорбута-туппута биллэр-көстөр эбит буоллаҕына, биһиги үөлээннээхпит Николай Ильич, суох буолбутун да кэннэ, кини туһунан туох эмэ өйдөбүл — бэлиэ хааллар ханнык диэн бу суруйдум.
Хомойуох иһин, оҕолоро-уруулара, аймахтара бааллар эрээри, Николай Ильич туһунан кэпсээннэрэ кэмчи, киһи иилэн ылара суох курдук. Биһиги улууспутугар, Промышленнайга олорбут, үлэлээбит, Николай Ильич Игнатьевы билэр дьон кини үлэтин-хамнаһын, олоҕун туһунан тугу билэргитин кылгас да буоллар ахтыы суруйан «Дабаан» хаһыат редакциятыгар тиксэрэргит буоллар махталлаах суол буолуо этэ.
Геннадий Васильевич Иванов, Куокуй нэһилиэгин олохтооҕо.