Тыайа нэһилиэгин «Кэнчээри» уһуйаан коллектива өрүү сонун тэрээһиннэринэн нэһилиэк олохтоохторун сэргэхситэр. Анна Алексеевна Иванова салайааччылаах бу тэрилтэ быйыл оскуолаҕа киирэр саастаах оҕолоро, төрөппүттэрэ, иитээччилэрин кытары Улуу Кыайыы 80 сылын көрсө «Саха саллаата кыайыы суолунан» диэн биир дойдулаахпыт, буойун суруйааччы Тимофей Егорович Сметанин айымньыларынан литературнай дьүһүйүү бэлэмнээн туруордулар.
Тэрээһини иитээччи Прасковья Алексеевна Дьяконова уонна Айсена Семенова ийэтэ Софья Васильевна Семенова иэйиилээхтик саҕалаатылар.
Дьүһүйүүнү Василина Полятинская «Эдэркээн доҕорум» хоһоону чуор куолаһынан хоһоонноохтук этэн саҕалаата. Даниил Софронеев «Сирдээҕи дьолу билэбин» хоһоонун доргуччу аахта, Айна Винокурова «Өстөөххө өлүү», «Эһиги кыайыыны түмүктээн…» хоһооннору иҥнибэккэ ааҕан хайҕаатыбыт. Айсена Семенова «Анюта» нууччалыы тылбаастаммыт хоһоонун ийэтин аттыгар туран эппитэ барыбыт сүрэҕин манньытта. Бу хоһоон атын куплеттарын темаҕа сөп түбэһиннэрэн бэрт наҕыллык, ис киирбэхтик аахта. Маны сэргэ «Ийэ дойду иһин» хоһоону оҕолор монтаж көрүҥүнэн доргуччу, кыһаллан туран дорҕоонноохтук, хоһоонноохтук, олус чуолкайдык саҥаран өйдөрүттэн эппиттэрэ астыннарда. Инникитин бу дьарыктарын салгыы сайыннаран истэхтэринэ саҥарар кыахтара эрэ буолбакка, өй-санаа өттүнэн эмиэ үтүөҕэ-кэрэҕэ тардыһыылара күүһүрэригэр эрэли сахта.
Тэрээһин иннигэр ас атыытын дьаарбаҥката ыытылынна. Манна уһуйаан үлэһиттэрэ 9700 солк., бэлэмнэнии бөлөх иитиллээччилэрин төрөппүттэрэ — 3000 солк., Валентина Алексеевна Полятинская уонна Мария Михайловна Дьяконова — 500түү солкуобай, «Алаас» эбээ түмсүүтэ көхтөөхтүк кыттан көмө оҥордулар.
Онон барыта холбоон 13200 солкуобай киирбит. Бу үбү уһуйааҥҥа өр кэмҥэ иитээччинэн үлэлээбит Аксинья Семеновна Иванова СВО-ҕа сылдьар буойун уолаттарыгар ыытарга быһаардылар.
Көрөөччүлэр уһуйаан оҕолорун таптыы, билиигэ тардыһан өссө да үрдүк ситиһиилэргэ дабайа турууну баҕаран тарҕастыбыт.
Екатерина Архипова