Мукучубут нэһилиэгэр Аҕа дойдуну көмүскээччилэр күннэригэр анаммыт тэрээһиннэр тиһигин быспакка салҕаналлар. Ол курдук олунньу 20 күнүгэр «Дайан» норуот айымньытын дьиэтин үлэһиттэрэ үгэскэ кубулуйбут тэрилтэлэр икки ардыларыгар ыытыллар «Суһал сулууспа…» квест оонньууну алтыс төгүлүн тэрийэн ыыттылар.
Быйылгы күрэххэ биэс тэрилтэ судургута суох сэттэ суһал сулууспа түһүмэҕин тургутуутун ааста. Эрбии тииһинии илин-кэлин түсүһүү тэрилтэ эр хоһууттарын долгутта. Хас биирдии кыттааччыбыт тэрилтэ чиэһин көмүскүү кэлбитин өйдөөн туран түһүмэхтэр аайы олус кыһаллан туран кытыннылар. Быйылгы күрэххэ тэрилтэни билиһиннэрии, хомуур оонньуу, сыалы табыы, корнхолл, сорудаҕы толоруу, ырааҕы ыстаныы, хааһы сиэһин саҥа кыттааччыларга сонун буолла. Хаһыс да сылын кыттар эр хоһууттарбыт сонун көрүҥ киирбитин сэргээтилэр.
Дьэ тыҥааһыннаах киирсии түмүгүнэн муҥутуур кыайыылаах аатын Саха төрүт оонньууларын көрүҥнэригэр оҕо спортивнай оскуолатын хамаандата Ярослав Белолюбскай, Павел Николаев ыллылар. Кыайыы өрөгөйүн билбит хамаандаҕа «Алаас» маҕаһыын — урбаанньыт Татьяна Николаева анал бирииһэ 4 тыһыынча суммалаах сертификат туттарылынна. Ону тэҥэ күрэх бука бары кыттыылаахтарыгар «Бигэ» маҕаһыын — урбаанньыт Петр Ксенофонтов, «Дайан» норуот айымньытын бириистэрэ туттарылыннылар. Маны тэҥэ тэрилтэлэр үлэһиттэригэр бэлэхтэрин утары уунан соһуччу үөрүүнү бэлэхтээтилэр.
Эркин курдук эрэнэр, дурда-хахха буолар эр хоһууттарбытыгар мэлдьи өттүк харалаах сылдьалларыгар, күн күүһэ көмүскэллээх буолалларыгар баҕарабыт! Түбүктээх үлэлэрин быыһыгар кэлэн Суһал сулууспа тургутуутун ааһан, сэргэхсийэн, бэйэ бэйэҕэ күүстээх санааны, бигэ тирэҕи баҕаран, биир санаанан салайтаран кытыыны ылбыттарыгар ону тэҥэ урбаанньыттарбытыгар мэлдьи биһиэхэ күүс-көмө буолалларыгар махтанабыт! Мэлдьи бу курдук көхтөөх буолуҥ, дьиэ кэргэҥҥитигэр үөрүү үктэллээх, дьол аргыстаах олоҕу баҕара, тускуну туһаайа эһиилги күрэххэ көрсүөх буолан тарҕастыбыт.
Вера Прокопьева, Мукучу.