НэҺилиэкпит, улууспут сайдыытыгар үгүс сыратын биэрбит, кылаатын киллэрбит Егор Авксентьевич Павлов алтынньы 7 күнүгэр 80 сааҺын томточчу туолла.
Егор Авксентьевич оскуолатааҕы кэмнэриттэн, олоххо активнай көрүүлээх, спортсмен быҺыытынан биллэр этэ. 1970-1975 сс. Саха государственнай университетын историческай факультетын ситиҺиилээхтик үөрэнэн бүтэрэн Үгүлээт оскуолатыгар Бүлүү оройуонугар үлэтин саҕалыыр. 1976 с. Сиэгэн Күөл орто оскуолатын директорынан ананан 12 сыл үлэлиир. Үлэлээбит кэмнэригэр Сиэгэн Күөл орто оскуолата материальнай-техническай базата тупсар, иитии, үөрэх, спорт өттүгэр үлэ күүскэ барбыта.
1987-1992 сс. Кэбээйи нэҺилиэгин сэбиэтин бэрэссэдэтэлинэн талыллан үлэлиир. 1990-1991 сс. олорон кэлбит дойдубут ССРС эстэр, Российскай Федерация састаабыгар киирэммит социальнай-экономическай, политическай ыарахаттары ааҺан, сайдыы суолугар киирэбит. Егор Авксентьевич ити кэмнэри чиэстээхтик нэҺилиэгин салайар.
Ити кэнниттэн нэҺилиэк баҺылыгын солбуйааччытынан үлэлиир. Онтон 2003 сыллаахха саҥа тэриллибит улуустааҕы «АҺымал» дьиэтин директорынан ананан 2007 с. сабыллыар диэри үлэлиир. Кураанах икки этээстээх дьиэни материальнай-техническэй, баҺаарынай, санитарнай өттүнэн ирдэбилгэ эппиэттиир гына тупсарар. Балаҕан, ичигэс туалет, баанньык, теплица туттарар, подсобнай хаҺаайыстыба тэрийэр. Кэбээйитээҕи «АҺымал» дьиэтэ 2006 с. республикаҕа 10 бастыҥ аҺымал дьиэлэр ахсааннарыгар киирэр.
2008-2020 сс. Кэбээйитээҕи кыраайы үөрэтэр түмэл директорынан таҺаарыылаахтык үлэлиир. Түмэл экспонаттарынан хаҥыыр, 10-тан тахса «Ытык сирдэргэ» өйдөбүнньүк бэлиэлэр туруорулуннулар, сирдэр ааттара, манна олоро сылдьыбыт дьоннор үйэтитиннилэр. Биллиилээх суруйааччыбыт Т.Е. Сметанин аатын үйэтитиигэ анаан 95 сааҺыгар киниэхэ анаммыт балаҕан тутулунна, 100 сааҺыгар анаан 2019 с. араас тэрээҺиннэр буоллулар.
Түмэл эдэр үүнэн эрэр ыччаты патриотическэй тыыҥҥа, ийэ дойдуга бэриниилээх буоларга , нэҺилиэккэ, улууска кыраайы үөрэтиигэ үлэни киэҥник сайыннарар, төрөөбүт сирбитин-уоппутун, түөлбэлэрбит историяларын үөрэтии киининэн буолла. Улуу кыайыы 65, 70 сс. «Ытык сирдэри» оҥорууга, көрүүгэ, туҺаныыга республикаҕа түмэлбит бастаабыта. 2016 с. Россияҕа бастыҥ үлэлээх культура тэрилтэтинэн ааттаммыта.
Егор Авксентьевич ханнык да тэрилтэҕэ үлэлээтэр, кыҺамньылаах, таҺаарыылаах үлэтинэн, дьоҥҥо үтүө сыҺыанынан биллэр суолун хаалларда.
Кини билигин төҺө да сынньалаҥҥа олордор, нэҺилиэк бэтэрээннэрин сүбэтин салайааччытынан үлэлиир, уопсайа 12 кинигэ ааптара, салайааччыларга, үөлээннээхтэригэр сүбэлии-амалыы сылдьар.
Егор Авксентьевич биҺиги ортобутугар баарыттан үөрэбит, өссө да уҺун сылларга эдэрдии эрчимнээх, тэтимнээх, доруобай сылдьарыгар баҕарабыт!
Григорий Егоров, П.Д. Степанов аатынан Кэбээйитээҕи кыраайы үөрэтэр түмэл директора