Сииттэ сирэ дириҥ силистээх — мутуктаах, бэйэтэ туһунан кэрэхсэнэр сэһэннээх, номохтоох, киэн туттар туруу үлэһит дьоннордоох дойдуннан, Кэбээйибит улууһугар, Саха Республикатыгар биллэр — көстөр. Төһө да олохтоох дьон ахсаана аҕыйаатар, нэһилиэкпит син биир сайдар кэскиллээх, туруктаах диэн инники өттүгэр эрэллээхпит.
Сииттэбит нэһилиэгэр салайар өттүгэр сатабыллаах, бар дьонун түмэр дьоҕурдаах, аҕа баһылыкпыт Семен Тимофеев, сайдыы суола эдэр ыччаттан саҕаланар диэн санааннан, өрө күүрүүлээхтик үһүс сылын үлэлиир-хамсыыр.
Нэһилиэкпит дьоно — сэргэтэ, эмиэ атын тыа сирин олохтоохторун курдук от оттоон, мас мастаан, сир аһын хомуйан, күөллэригэр балыктаан, тыаларыгар бултаан, хороҕор муостааҕы, сыспай сиэллээҕи дэлэйдик ииттэн, күн бүгүнүгэр дылы үчүгэйдик дьаһанан олороллор. Тыа сиригэр биллэн турар, тыа хаһаайыстыбата улахан оруолу ылар, билигин нэһилиэкпитигэр 370 сүөһү, 240 сылгы баара биллэр. Быйыл сайын айылҕабыт барахсан туран биэрэн 871 туонна, үрдүк хаачыстыбалаах оту оттооннор, бар дьоммут астынан олороллор.
Чөл туруктаах, тобуллаҕас толкуйдаах, үөрэхтээх кэнчээри ыччаттар үүнэн — сайдан тахсалларыгар үөрэх кыһата бастакы олугу уурарын бары билэбит. Билиҥҥи туругунан В.Е. Колмогоров аатынан Сииттэбит орто оскуолатыгар 61 оҕо 2024 — 2025 үөрэх сылыгар үөрэнэр. «Чуораанчык» оҕо уһуйааныгар 26 оҕо сырдыкка — кэрэҕэ уһуйуллаллар. Оскуолабыт учууталлара, уһуйааччылара биир сиргэ олорон, тохтоон хаалбакка, билиҥҥи сайдыыны кытта тэҥҥэ барсан, сонун сүүрээннэри, саҥа көрүүлэри олоххо киллэрэргэ дьулуһаллар.
Нэһилиэкпит олохтоохторо олус түмсүүлээх, олоххо, сырдыкка — кэрэҕэ баҕалаахтар диэн сэмэй соҕустук ахтан ааһыахпын баҕарабын. Мотрена, Семен Васильевтар «Аартык» бааһынай хаһаайыстыбалара үрүҥ аһы дэлэйдик үрүйэлии сүүрдэ олороллор.
Маны таһынан саҥа үйэ аныгы олоҕор олорсон, Сииттэбитигэр АТС, суотабай сибээс, уу ситимнэрэ холбонон, дьон олоҕун чэпчэтэр уонна бары өттунэн сайыннарар. Нэһилиэкпит урбаанньыттара, чааһынай маҕаһыыннарыгар ас-үөл, таҥас-сап, хаһаайыстыбаннай туттар малы-салы барытын аҕалан, атыылыы олороллор. Бөһүөлэкпитигэр балыыһа, почта күннээҕи дьон кыһалҕатыгар көмөлөһөн, сөптөөхтүк толороллор уонна дьаһаналлар.
Ити курдук, сииттэлэр, тыа сиригэр олорор дьон быһыытынан сүрүн сыалбытын-сорукпутун сөптөөхтүк, табатык дьаһанан, эбии дохуот киллэринэн, сатабыллаахтык көрүнэн олордохпутуна, ол буолар буоллаҕа — күннээҕи ситиһии, салгыы сайдар саҕах.
Марианна Сивцева