Сииттэҕэ харах уулаах кутурҕан күннэр… Быстах байыаннай дьайыы эмиэ, Аҕа дойду уоттаах сэриитин курдук, хас биирдии дьиэ кэргэни хаарыйда. Оҕолорбут, бырааттарбыт, убайдарбыт, чугас аймах дьоммут, кырыктаах сэрии толоонугар сураҕа суох сүттүлэр, геройдуу оҕуннулар…
Олус курус санаа, сүрэҕи — быары хам тутар. Хас биирдии киһи харах уута суох истибэт бу ыар сурахтары. Эрэнэр эркиннэрбит, киэн туттар ыччаттарбыт, эрчимнээх эдэркээн оҕолорбут суох буолбуттарын истэн дууһа кыланар, сүрэх хаанынан ытыыр. Кинилэр эмиэ атын оҕолор курдук астына — дуоһуйа күөлэһийбиттэрэ эбээт, дойдуларын күөх ньаассын сымнаҕас отугар, сөтүөлээн — көрүлээн ааспыттара, күҥҥэ күлүмүрдүү оонньуур, эбэлэрин ыраас уутугар. Саха буолар булчут хааннара баһыйан, байанайдара тосхойон, илии тутуурдаах, өттүк харалаах, үөрэн — көтөн дьиэлэригэр киирэн кэлэллэрэ эбээт кинилэр. Ийэ, аҕа айманыыта, хааннаах харах уута, кыһыы — аба сатарыыта, бу ыар аһыыны — кутууну, билэн эрдэхтэрэ, көмүс чыычаахтарын сүтэрбит, инникигэ эрэллэрэ быстыбыт, күндү көмүс төрөппүттэр. Киһи тылынан эппэт, сурукка тиспэт, ыар аһыыгытын, сүтүккүтүн биир дойдулаахтаргыт тэбис тэҥҥэ үллэстэбит. Бука бары кэриэстиэҕиҥ, ахтан — санаан ааһыаҕыҥ, бүгүҥҥү күн умнуллубат геройдарын Дмитрий Новгородовы, Денис Кривошапкины, Александр Важенины.