Сииттэ нэһилиэгэр Кыайыы 80 сылыгар, Россияҕа Аҕа дойдуну көмүскээччилэр, Саха сиригэр Ийэ дойдуну, улууспутугар Патриотизм сылларынан, ону кытта нэһилиэкпитигэр «Үйэтитии» сыла биллэриллибитинэн, үйэлээх, аныгылыы өйдөбүнньүк бэлиэлэри туруоруу, сүрүн үлэлэр бара туралларын туһунан билиһиннэрэбин.
Саас-сааһынан сиһилии суруйдахха, Сииттэ орто оскуолатын «Ситим» кыраайы үөрэтэр краевед, учуутал Анна Лазаревна Сивцева анал проегынан, биир дойдулаахтарбыт уоттаах сэриигэ дойдуларын чиэһин көмүскүү аттаммыт сирдэриттэн, былырыын өйдөбүнньүк мэҥэ таас туруоруллубута.
Бу үйэлээх проегы олохтоох дьаһалта баһылыга Семен Тимофеев өйөөн, баһылык солбуйааччыта Петр Степанов, тыа хаһаайыстыбатын испэсилииһэ Дмитрий Колмогоров уонна Сииттэ орто оскуолатын үлэһиттэрэ Гаврил Слепцов, Василий Горохов буоланнар, түмсэ, быһаарса охсон анал таас тиэйэн аҕалан, суругун-бичигин анал сиргэ сакаастаан, суруттаран, нэһилиэкпит көстүүлээх килбэйэр киинигэр туруораннар, биир улахан, кэскиллээх үлэни ыыппыттара буолар.
Быйыл Кыайыы 80 сылынан өйдөбүнньүк памятниктары эбии ситэрии үлэтэ күүстээхтик ыытылла турарын көрөн олохтоохтор астына, кэтэһэ сылдьаллар. Ол курдук, «Мин мантан сэриигэ барбытым…» ону тэҥэ кыһыл сулустаах биир дойдулаах бэтэрээн дьоммутугар анаан, олохтоох дьаһалта (баһылык Семен Тимофеев) хас биирдии киһи, кэлэр кэскиллэрбит үйэ тухары киэн тутта, көрө — билэ сылдьалларын туһугар, бэртээхэй тымныыны, куйааһы тулуйар аныгы матырыйаалларынан истиэндэлэри оҥотторон, бу күннэргэ таҥан, туруора сылдьаллар.
Үөрэ — көтө бэлиэтиэхпин баҕарабын, Сииттэ орто оскуолатын учууталлара (директор Андрей Новгородов) Николай Дьяконов, Анна Сивцеваны кытта аныгы технологияны баһылаан, хас биирдии бэтэрээннэр хаартыскаларын анныгар куар код туруоран, чугас аймахтара, оҕолоро, сиэннэрэ эрэйэ суох телефоннарын даҕайдылар да бары дааннайдара тахсан кэлбитин көрөн олус астыннылар, ис сүрэхтэн махтаннылар. Бу үйэлээх тутууга нэһилиэкпититтэн элбэх киһи күүс -көмө буоллулар. Сииттэ орто оскуолатын учууталлара, кылаас салайааччылара, олохтоох библиотека сэбиэдиссэйэ Мария Обутова.
Бу күннэргэ барыта таҥыллан, оннун булла да Сииттэбит нэһилиэгэр истиэндэлэрбит үөрүүлээх арыллыыта буоларын бука бары долгуйа күүтэбит. Дьэ, ити курдук, Кыайыы 80 сылыгар сөп түбэһиннэрэн Кыайыыны түстэспит убаастыыр бэтэрээннэрбитин үйэтитэр ытык иэспит буоларын ханна да, хаһан да умнуохпут суоҕа.
Марианна Сивцева