Сииттэбит нэһилиэгэр сылбыт үөрүүлээх арыллыытын бырааһынньыга буолан ааста. Тэрээһиммитин олохтоох дьаһалта баһылыга Семен Тимофеев, бар дьонун үүммүт үтүө сылынан эҕэрдэлээтэ уонна бастыҥнарга үрдүк наҕараадалары туттартаата. Ол курдук Сииттэбит көхтөөх, бары үлэлэргэ бастакы күөҥҥэ сылдьар дьоммутугар, «Премия главы наслега» номинациялары, бастыҥтан бастыҥнар туттулар. Тэрээһиҥҥэ үөрэтээччилэртэн саҕалаан, нэһилиэкпит бары араҥата кыттыбыта бырааһынньыктааҕы кэнсиэрпитин өссө сэргэхситтэ уонна сомоҕолоото. Кыайыы 80 сылын көрсө, патриотизм сылыгар сөп түбэһиннэрэн, күлүгүнэн туруоруллубут, «Тыыннаахтар умнубат сыллара..» композицияны кэлбит дьон бары уйадыйа, астына көрдүлэр. Сииттэ орто оскуолатын (директор А. Новгородов) учууталлара толорбут «Хайыһар» ырыалара, «Чуораанчык» детсад (сэб. Ольга Александрова) иитээчилэрин «Катюша» байыаннай ырыаларын астына иһиттибит. Икки бөлөҕүнэн арахсан, сонун үҥкүүлэри туруорбут Мария Захароваҕа махтал бастыҥын тиэрдэбит. Олус истиҥ, киьи эрэ истэ олоруох бииртэн биир кэрэ куоластаах ырыаһыттарбыт Нарыйа Иванова, Мария Новгородова, Рустам Расулов, сыана бэтэрээннэрэ Николай Захаров, Елена Платонова, «Алаһа» эбэлэр кулууптара (сал. Мотрена Васильева), эр дьон ансаамбылын толоруулара дохсун ытыс тыаһынан арыаланна. Сангаартан сылдьар ыалдьыппыт Николай Данилов олус истиҥ ырыаны, Сииттэ дьонугар — сэргэтигэр бэлэх уунан, көрөөччүлэр дохсун ытыс тыастарынан арыаллаатылар. Тэрээһини иилээн — саҕалаан, салайан ыыппыт, Захар Кривошапкинҥа, Мария Расуловаҕа улахан махталбытын тиэрдэбит. Кырачааннарбыт үҥкүүлэрин таҥаһын тикпит, тарбаҕар талааннаах Марианна Захароваҕа барҕа махталбытын тиэрдэбит. Кыттыыны ылбыт, үөрүүбүтүн тэҥҥэ үллэстибит, быстах байыаннай дьайыыга сылдьар, биир дойдулаахтарбытыгар, ассамблеяҕа харчы угарбытыгар күүс — көмө буолбут дьоммутугар, өссө төгүл барҕа махтал. Тэрээһиҥҥэ барыта, ыалдьыттардыын 120 тахса киһи сырытта. Бу курдук нэһилиэкпитигэр улахан, баараҕай үлэлэр, хас биирдии олохтоох үөрэ — көтө истэр сонун былааннара элбэхтэрин, баһылыкпыт бар дьонугар билиһиннэрдэ. Сиһилии улууспут дьонугар үөрүүбүтүн үллэстэн, тапталлаах улууспут хаьыатыгар суруйан иһиэхпит диэн эрэннэрэбит.
Марианна Сивцева