Сииттэбит нэһилиэгэр Улуу Кыайыы 80 сылын уруйдуур тэрээһин олус сэргэхтик, өрө көтөҕүллүүлээхтик буолан ааста.
Нэһилиэкпит дьоно — сэргэтэ, дириҥ ис хоһоонноох тэрээһиҥҥэ Кыайыыны уһансыбыт, эйэлээх олох оҥкулун түстэспит, уоттаах сэрии хонуутугар хорсун быһыыларыгар кинилэр үтүө ааттарыгар сүгүрүйээри, айхаллаары, биир киһи курдук Кыайыы искибиэригэр тоҕуоруһа муһуннулар.
Кыайыы параадынан тэрээһин саҕаланна. Сэлэлии хаамыыга оҕо уһуйаанын иитиллээчилэриттэн саҕалаан баран, саастаах дьоммутугар тиийэ бары көхтөөх кыттыыны ыллылар. Бырааһынньыктааҕы тэрээһини олохтоох дьаһалта баһылыга Семен Тимофеев үөрүүлээх быһыыга — майгыга арыйда. Сэрии кэмин оҕолорун ааттарыттан, Кыайыы 80 сылынан, эҕэрдэ тыл бастыҥын тириэртэ нэһилиэкпит бочуоттаах олохтооҕо Борис Иннокентьевич Иванов. Анал байыаннай дьайыыга сылдьар оҕолордоох төрөппуттэр ааттарыттан, үтүө тыл бастыҥын Роман Попов анаата. Түөлбэлэрбит салайааччыларыгар, бары олохтоохторбутугар, суолта ууран, бар дьоҥҥутун убаастаан, кэриэстээн кэлэн, тэрээһиҥҥэ кыттыыны ылбыккытыгар улахан махталбытын тиэрдэбит. Нэһилиэкпит үөрүүлээх тэрээһинигэр ис дууһаларын ууран туран кыттыбыттара, кыһаллан туран бэлэмнэммиттэрэ, хас биирдии көрөөччүнү олус долгутта уонна уйадытта.
Ол курдук, түөлбэлэринэн Кыайыы вальстара, дириҥ ис хоһоонноох композициялара, байыаннай фотозоналара сонун көстүү буолла диэн көрөөччүлэр ис сүрэхтэриттэн үөрбүттэрин, астыммыттарын биллэрдилэр. Көрөөччүлэрбитин кыайыы алгыстаах алаадьыларынан, ону кытта сэрии кэмин хааһытынан күндүлээтибит. Нэһилиэкпит бары тэрилтэлэрэ, шефтэһэр кырдьаҕастарыгар өйдөбүнньүк бэлэхтэри туттартаатылар.
Тэрээһиҥҥэ олохтоох дьаһалта дьиэтигэр кырдьаҕастарбытыгар анаан, мааны бырааһынньыктааҕы остуолу тилэччи тардан бар дьоммутун чиэстээтибит. Саха Республикатын, Кэбээйибит улууһун дьаһалтатын, олохтоох дьаһалта сертификаттарын, тэрилтэлэр бэлэхтэрин тутан бар дьоммут наһаа астыннылар уонна махтаннылар, ону тэҥэ оскуола үөрэнээччилэрэ, шефтэһэр кырдьаҕастарыгар киһи астынар болҕомтотун уурдулар, дьиэннэн сылдьан эҕэрдэлээтилэр. Улуу Кыайыыны уһансыбыт бар дьоммут аатыгар сүгүрүйдүбүт, махтанныбыт.
«Суох буоллун сэрии, туругур эйэ» диэн ырыа тылынан кылгас сонуммун түмүктүүбүн.
Марианна Сивцева