Сииттэбит нэһилиэгэр култуура уонна олохтоох дьаһалта үлэһиттэрин көҕүлээһиннэринэн Улуу Кыайыы 80 сылыгар аналлаах, ону тэҥэ чөл олоҕу ыччат оҕолорбутугар пропагандалыыр сыалтан, «Кыайыы кубога» диэн түөлбэлэр икки ардыларыгар ыытыллыбыт волейбол күрэҕэ бэрт тыҥааһыннаахтык ааспытын үөрэ — көтө бэлиэтиибит.
Күрэххэ 4 хамаанда күөн көрүстүлэр. Ол курдук, «Сардана» түөлбэ (сал. Г. Слепцов), «Өркөн» түөлбэ (солбуйааччы С. Обутова), «Дьүкээбил» (сал. А. Дьяконова) ону кытта Сииттэ орто оскуолатын волейболга сборнайын кэскиллээх кыргыттара (тренер И. Охлопков). Сэргэх киирсиилээх волейбол оонньуу күрэҕэ Сииттэбит элбэх ыччатын муспутун көрөн хас биирдии көрөөччү астына бэлиэтээбит буолуохтаах. Улахан махталбытын тиэрдэбит волейбол оонньуутун бары кистэлэҥин баһылаабыт, опыттаах тренербытыгар Иннокентий Охлопковка.
Күрэх түмүгүнэн «Өркөн» түөлбэ хамаандата — бастакы миэстэ, иккис миэстэни — кыргыттар хамаандалара, үһүс бочуоттаах миэстэҕэ — «Сардана», төрдүс — «Дьукээбил» түөлбэлэр тигистилэр. Кыайыылаахтар анал Кыайыы кубогынан уонна дипломнарынан наҕараадаланнылар.
Тэрийээччилэр ааттарыттан бары кыттыбыт оҕолорбутугар, түөлбэ салайааччыларыгар, кыттааччыларбытыгар барҕа махталбытын тиэрдэбит. Инникитин ыытыллар тэрээһиннэргэ бу курдук биир сомоҕо буолан өрүү кыайыы кынаттаныҥ диэн алгыс баһын сыалыыбыт.
Марианна Сивцева