Бүтүн Россиятааҕы бибилэтиэкэ күнүгэр үгэс буолбут VII төгүлүн ыытыллар «Кинигэ күүһэ» диэн Өрөспүүбүлүкэтээҕи акция Россияҕа Аҕа дойдуну, Саха сиригэр Ийэ дойдуну көмүскээччилэр уонна Улуу Кыайыы 80 сылларыгар ананна.
Тэрээһин сыала — ааҕыыны көҕүлээһин, кинигэҕэ тапталы иҥэрии, бибилэтиэкэ үлэтигэр уопсастыбаннас болҕомтотун тардыы буолар. Тэрээһиҥҥэ Сииттэбит орто оскуолатын алын кылааһын үөрэнээччилэрэ, «Чуораанчык» уһуйаан иитиллээччилэрэ кыттыыны ыллылар. Аахсыйа кыттааччыларын нэһилиэк баһылыга Семен Тимофеев эҕэрдэлээтэ уонна оҕолорго сайыҥҥы сынньалаҥнарыгар элбэх кинигэни ааҕан сайыны туһалаахтык атааралларыгар баҕарда.
Ааҕааччынан алын сүһүөх кылаас учуутала, нэһилиэкпит депутата Ульяна Петрова буолла. Кини Тимофей Сметанин «Егор Чээрин» сэһэниттэн оҕолорго ааҕан иһитиннэрдэ. Бу сэһэҥҥэ Тимофей Сметанин Саха саллаатын уобараһынан оччотооҕу эдэр киһини Чээрининэн көрдөрөр. Саха норуотун муудараһын илдьэ сылдьар айымньы, норуот сүрүн өрүтүн эр санааны, киэҥ-куоҥ көҕүстээх үтүө-мааны майгыны, аһыныгас буолууну уонна араас омук бэйэ-бэйэлэригэр истиҥ сыһыаннарын, омук быһыытынан сүрүн уратыларын арыйан көрдөрөр. Оҕолор чуумпуран олорон олус сэргээн иһиттилэр. Сэһэн ис хоһоонун ырыттылар, ыйытыыларга эппиэттээтилэр.
Иккис ааҕааччынан олохтоох кулууп директора, нэһилиэк депутата, Марианна Сивцева буолла. К. Чуковскай «Доктор Айболит» диэн остуоруйаны дорҕоонноохтук ааҕан иһитиннэрдэ, кулууп үлэһитэ Николай Захаров «Айболит» оруолун оонньоон оҕолор интэриэстэрин тарта. Марианна Семеновна «Остуоруйаһыт» оруолун «остуоруйа дьиэтигэр» олорон аахпытын оҕолор олус сэргээн иһиттилэр, сэҥээрдилэр.
Тэрээһиммит ыалдьыттарынан «Алаһа» эбээлэр түмсүүлэрэ буоллулар. Эйэҕэс эбээлэрбит оҕолорго «сүүтүк» сүбэлэри биэрдилэр. Үлэ бэтэрээнэ, доруобуйа харыстабылын үлэһитэ Татьяна Герасимова оҕолорго кинигэни таптыырга, элбэхтик библиотекаҕа сылдьан ааҕарга сүбэлээтэ.
#Силакниги акцияҕа кыттыбыт оскуолабыт үөрэнээччилэригэр уонна ааҕааччыларга махтанан туран сертификаттары туттардыбыт. Тэрээһин бэрт туһалаахтык ааста, үөрэнээччилэр бэйэлэрин сөбүлүүр остуоруйаларын аахтылар, кэпсээтилэр. Түмүккэ тэрээһиҥҥэ кыттыбыт оҕолорбутугар Библиотека күнүнэн минньигэһинэн күндүлээтибит.
Ити курдук бэрт сэргэхтик Библиотека күнүн атаардыбыт. Кыттыыны ылбыт бары ааҕааччыларбытыгар, тэрилтэ салайааччыларыгар, олохтоох кулууп үлэһиттэригэр (дир. М.С. Сивцева), «Чуораанчык» уһуйаан коллективыгар (сэб. О.П. Александрова), оскуола коллективыгар (дир.А. В. Новгородов) , «Алаһа» эбээлэр түмсүүлэрэ (сал М.Л. Васильева) уонна нэһилиэкпит баһылыгар С.Т. Тимофеевка махталбытын тиэрдэбит.
Мария Обутова, Сииттэ нэһилиэгэ.