Сииттэбит олохтоохторугар сыл аайы анаан, олохтоох култуура киинин үлэһиттэрэ тыһыынчаннан арассаадалары олордон, көрөн — истэн, ыам ыйын бүтүүтэ атыыга таһаараллара үгэскэ кубулуйда.
Манна помидор 5 — 6 көрүҥнэрэ, оҕурсуу 4 — 5, баклажаннар, кабачкилар, перецтэр, дьэдьэн хас да көрүҥүн бар дьоммутугар атыыга, удамыр сыанаҕа атыылаан махтал тыл бастыҥын тутаммыт сүргэбит көтөҕүллэр, дууһалыын үөрэбит. Нэһилиэкпит дьоно — сэргэтэ кылгас самаан сайыммытыгар оҕуруот аһын өлгөмнүк олордон эбии дохуот киллэринэр буолтара быданнаата. Билиҥҥи кэмҥэ сибиэһэй бэйэ үүннэрбит, нитрата, удобрениета суох доруобай, битэмииннээх аһы кэнсиэрбэлээн, тоҥорон ханнык баҕар бырааһынньыктарга боростуой күннэргэ да сии — аһыы олорор саныырга да астык.
Маны таһынан сибэкки 8 арааһын арассаадалаан атыылыыбыт, дьэ манна баар кырдьык хас биирдии киһи хараҕын үөрдэр араас кэрэ — нарын, кыраһыабай сибэкки эгэлгэтэ буолар. Онон кулууппутугар сөбүгэр сыанаҕа атыылаан эбии дохуот киллэрэммит, тэрээһиннэрбитигэр бэртээхэй бириистэри туруоран бар дьоммутун үөрдэбит. Нэһилиэкпит олохтоохторо сибэккинэн хас биирдии ыал дьиэлэрин таһын киэргэтэллэрин олус сөбүлүүллэр. Хаһыс да сылын оҕуруот өлгөм үүнүүтүгэр «Сиэдэрэй сибэккилээх уһаайба» диэн култуура үлэһиттэрэ күрэх ыытан өссө стимуллаан, элбэх киһини тардар буолбуппут үгэскэ кубулуйда. Маны таһынан олохтоох дьаһалта баһылыгын бириэмийэтин «Сиэдэрэй тиэргэн» күрэҕэ саҥа дьыл күүтүүлээх күнүгэр хаһыс да сылын туттарыллан, олохтоох дьон олус астыналларын бэлиэтиэхпин баҕарабын. Үһүс сылбытын быстах эпэрээссийэҕэ сылдьар оҕолордоох дьиэ кэргэттэрбитигэр оҕуруот рассаадаларын босхо түҥэтэн көмө буолабыт.
Дьэ, ити курдук, нэһилиэкпит далбар хотуттара үүнээйини толору баһылаатылар, тото — хана олордон бар дьоннорун битэмииннээх, сибиэһэй аһынан аһата — сиэтэ олороллоро олус үчүгэй.
Марианна Сивцева