Сииттэбит нэһилиэгэр суон дурдаларбытыгар, халын хаххаларбытыгар аналлаах, сытыы киирсиилээх бэртээхэй күрэх буолан ааста. Төһө да кыстыкка бэлэмнэнэн иллэҥнэрэ суох сырытталлар, аҕаларбыт барахсаттар быыс булан, хамаанда тэринэн кэлэн көхтөөх кыттыыны ыланнар олус астынныбыт.
Күрэҕи иилээн — саҕалаан ыыттылар Сииттэ орто оскуолатын физкультура учуутала Гаврил Петров, Сииттэ аҕаларын түмсүүтүн салайааччыта Николай Захаров уонна култуура дьиэтин уус — уран салайааччыта Евдокия Охлопкова. Олохтоох дьаһалта баһылыга Семен Тимофеев ыытыллар тэрээһиннэрбитигэр бастакыннан спонсордааччы, кини сыаналаах бириистэри туруорарыгар тэрийээччилэр олус үөрэбит уонна астынабыт. Улахан махталбытын тиэрдэбит Ольга Левинаҕа, Софья Николаеваҕа спонсордаан бар дьоҥҥутугар үөрүүнү бэлэхтииргитигэр.
Ол курдук, «Алаһа» эбэлэр кулууптара (сал. Мотрена Васильева) аҕаларга анаан минньигэс астаах остуол тэрийэн, махтал тыл бастыҥын туттулар. Курэххэ барыта 12 аҕа кыттыыны ылла. Күрэх биэс туһумэхтэн турда.
Астына — дуоһуйа үс чааһы быһа күөн көрсөн, күүс — уох былдьаһан, күрэхпит түмүгүнэн «Сардаана» түөлбэ аҕалара кыайыы өрөгөйүн билэннэр, харчыннан бириэмийэ тутан үөрүүлэрэ үгүс. Иккис миэстэни » Өркөн» түөлбэ, үһүс бочуоттаах миэстэни » Сарыал» түөлбэ ыллылар. Кыайыылаахтар бары анал грамоталарынан, мэдээллэринэн уонна харчыннан бэлэх тутан, астына сынньанан, дуоһуйа күрэхтэһэн үөрүүлэрэ улахан.
Өссө төгүл убаастанар аҕаларбытын Аҕа күнүнэн итиитик — истиҥник эҕэрдэлиибит. Ити курдук, барытыгар көхтөөх, инникигэ эрэллээх, Сииттэбит сирэ сайдарыгар инники күөҥҥэ сылдьыҥ диэн алгыс тыл маанытын аныыбыт.
Марианна Сивцева