Россияҕа норуоттар доҕордоһууларын, Саха Республикатыгар култуура, Кэбээйи улууһугар олоҥхо, Сииттэ нэһилиэгэр норуот айымньытын сыллара биллэриллибиттэринэн бар дьоммутугар эҕэрдэ тыл бастыҥын аныыбыт. Олоҥхо — саха норуотун бараммат баайа, дириҥ силистээх — мутуктаах омук буоларбыт туоһута. Ол курдук Сииттэ нэһилиэгэр тохсунньу 23 — 24 күннэригэр Олоҥхоҕо уонна култуура сылыгар аналлаах улахан тэрээһиннэр буолан аастылар. Олоҥхо дьиэлэрин ситимиттэн Лиэнискэй сэлиэнньэтин, Нам улууһун Прокопий Ядрихинскай-Бэдьээлэ аатынан Олоҥхо дьиэтин дириэктэрэ Вера Колпашникова, олоҥхо дьиэтин сүрүн специалистара Владимир Сыромятников, Руслан Павлов, норуот маастарын Руслан Захаров, Мэҥэ-Ханалас улууһун Гаврил Колесов аатынан Олоҥхо дьиэтин фольклор салаатын үлэһитин, «Олоҥхо батл» кылаан кыайыылааҕын Аксиния Степанова, Олоҥхо театрыттан лектор, бөлүһүөк, поэт, ырыаһыт Виктор Стручков, Аграфена Макарова аатынан Культура уонна ускуустуба колледжын фольклор салаатын преподавателэ Михаил Винокуров, Арктикатааҕы Эпос уонна ускуустуба киинэ холбоһуктаах культурнай — методическай десаны, Культура сылынан уонна Кэбээйибит улууһугар ыытыллар олоҥхо ыһыаҕар бэлэмнэнии чэрчитинэн улахан, көхтөөх, таһаарыылаах үлэлэр бардылар. Бөлөҕү салайан илдьэ сырытта, Артыкатааҕы эпос уонна искусство отделын сүрүннүүр үлэһитэ Евдокия Николаевна Иванова. Икки күн устата фольклор көрүҥнэригэр оҺуокайга, хомуска, тойукка, норуот ырыатыгар, кырыымпаҕа, олоҥхону олоҕурбут ньыманан толорууга, «Олоҥхо олох оҥкула», күн-ый халандаарынан олоҕу дьаһаныы, «Ыһыах» туһунан лекциялары, «Эр киһи дьиэ кэргэн тирэҕэ» эр дьону түмэргэ аналлаах кэпсэтиилэр буолан аастылар. Олоҥхо ыһыҕар бэлэмнэнэр НМК тула төгүрүк остуол, сүбэ-соргу ыытылынна. Ону таһынан кылгас кэмҥэ бэлэмнэнэ охсон, культурнай — методическай холбоһук кыттыылаахтара, Сииттэ олохтоохторун кытта, холбоһуктаах «Сииттэ түмэр түһүлгэтэ» диэн, дьин сахалыы тыыннаах бэртээхэй кэнсиэри туруоран бар дьоммутугар бэлэх ууннубут. Концерпытын сомоҕолуур оһуохайынан түмүктээтибит. Лиэнискэй сэлиэнньэтин Нам улууһун Прокопий Ядрихинскай — Бэдьээлэ аатынан, Олоҥхо дьиэтин директора Вера Колпашникова уонна Артем Васильевич Аргунов аатынан норуот айымньытын дьиэтин директора Марианна Сивцева, бииргэ утумнаахтык үлэлииргэ соглашение баттааһыытын үөрүүлээх түгэнэ буолан ааста.
Бастатан туран махтаныа этибит дириҥ ис хоһоонноох үлэ нэһилиэкпитигэр ыытылларыгар, кэпсэтии ыытан, транспортнай боппуруоһун быһаарбыт олохтоох дьаһалта баһылыгар Семен Тимофеевка. Ону таһынан, В. Е. Колмогоров аатынан Сииттэ орто оскуолатын көхтөөх учууталларыгар, үөрэнээччилэригэр (директор Андрей Новгородов) «Чуораанчык» уһуйаан иитээччилэригэр, иитиллээччилэригэр (сэб. Ольга Александрова), олохтоох дьаһалта кэлэктиибин үлэһиттэригэр (баһылык Семен Тимофеев), олохтоох библиотека сэбиэдиссэйигэр Мария Обутоваҕа, «Алаһа» эбэлэр кулууптарыгар (сал. Мотрена Васильева), кэнсиэри иилээн-саҕалаан ыыппыт эдэр уолаттарбытыгар Захар Кривошапкиҥҥа, Афанасий Гуляевка, Сииттэ орто оскуолатын, музыкаҕа учууталыгар Людмила Поповаҕа, айыыһыттан айдарыылаах алгысчыппытыгар Роман Поповка, «Иэйии» эдэр ийэлэр түмсүүлэригэр (сал. Марианна Захарова), Сииттэ орто оскуолатын минньигэс астаах повардарыгар, итии чэйдээх көрсүбүт Анастасия Ивановаҕа, Людмила Петроваҕа, Елена Платоноваҕа, Айталина Соловьеваҕа, ону кытта аска-үөлгэ көмө буолбут детсад үлэһиттэригэр Анастасия Охлопковаҕа, Екатерина Алексееваҕа ис сүрэхтэн тахсар үтүө тыл маанытын уонна махталын тиэрдэбит. Аһынан — үөлүнэн кыттыспыт, үтүө санаалаах Сииттэбит тэрилтэлэригэр. Тэрээһиммит этэҥҥэ ааһарыгар, күүс — көмө буолбут олохтоох дьаһалта баһылыгын солбуйааччытыгар Петр Степановка махтал маанытын тиэрдэбит. Ити курдук кыралыын — улаханныын элбэҕи билэн, астына — дуоһуйа үөрэнэн, ону чиҥэтэн холбоһуктаах эҕэрдэ кэнсиэркэ кыттан астынныбыт, үөрдүбүт-көттүбүт.
Марианна Сивцева