Сииттэбит нэһилиэгэр көмүс күһүн сылаас кэмнэрин баттаһа, сибиэһэй салгыҥҥа бэһүөлэкпитин ырааһырдар бэртээхэй түмсүүлээх субботник буолан ааста.
Түөлбэлэринэн үллэстэн, олохтоохторбут олорор уулуссаларын, күөллэрин, үрэхтэрин кырдалларын отун-маһын, бөҕүн-сыыһын барытын ыраастаан биир сиргэ чөмөхтөөбүттэрин, техникалаах уолаттар көрүөх бэтэрээ өттүгэр тиэйэн ыраастаан кэбистилэр.
Олохтоох дьаһалта баһылыктара Семён Тимофеев, Пётр Степанов — опыттаах салайааччылар, онон сөптөөх дьаһаллары ыланнар, үлэ хаамыыта быһаарыылаахтык ааспытын субботникка сылдьыбыт дьон астына бэлиэтээтилэр. Элбэх прицеп бөх сыбаалка сиригэр тиэрдилиннэ.
Киһи үөрэрэ диэн, эдэр ыччаттар кэнники кэмҥэ нэһилиэкпитигэр ыытыллар бары үлэлэргэ көхтөөх кыттыыны ылалларын элбэхтик бэлиэтии көрөр буоллубут. Күһүн, саас өрөспүүбүлүкэбитигэр көҕөрдүү үлэтин акцията тиһигин быспакка ыытыллар. Сииттэ нэһилиэгэ бу акцияҕа кыттыһан, көҕөрдүү үлэтин нэһилиэкпитигэр ыытарбыт үгэскэ кубулуйда. Ол чэрчитинэн олохтоох дьаһалта кэлэктиибэ хонтуораларын таһыгар 20 маһы олордон кэчигирэтэн кээстилэр. Этэнҥэ үүннэҕинэ, аҕыйах сылынан күөх сэбирдэхтэринэн суугунаан, бар дьонун тэлибирии көрсүө турдаҕа.
Төрөөбүт дойдубутугар бука бары ытык иэспит буоллаҕа — өрүү ыраастык тутан, сири-уоту нүөлсүтэн, иккис тыыннаан олох салҕыы устарыгар, ыччат дьоммут үүнэригэр-сайдарыгар холобур буоларбыт хайаан да наада. Ити курдук, Сииттэбитигэр билигин да үлэ-хамнас элбэх уонна улахан.
Марианна Сивцева