Сииттэбит нэһилиэгэр Ийэ декадатын чэрчитинэн «Оҕо кэскилэ — доруобай аска» диэн олус наадалаах, туһалаах тэрээһин буолан ааста.
Бүгүҥҥү тэрээһиммитигэр олохтоох дьаһалта баһылыга Семён Тимофеев, депутаттар, уһуйаан иитээччилэрэ, тэрилтэ салайааччылара, эбээлэр кулууптара, олохтоох библиотека үлэһиттэрэ, учууталлар, төрөппүттэр, үөрэнээччилэр олус көхтөөх кыттыыны ыланнар, тэрийээччилэри ис сүрэхтэн үөртүлэр. Кырдьык да, мантан көстөр буоллаҕа, оҕолорун доруобуйаларыгар, кинилэр тустарыгар кыһаллар буоланнар, суолта ууран кэлбиттэригэр барҕа махталбытын тиэрдэбит.
Тэрээһиммит сыала-соруга диэн, аныгы үйэ араас тумалаах, буортулаах астарыгар, утахтарыгар ананна. Билигин кистэл буотах корейскай, китайскай астарынан маҕаһыын прилавоктара, оҕолору эрэ умсугутуох курдук, көмүс, хачыгырас суулаах ас арааһынан туолан турарын элбэхтик көрөр буоллубут. Оҕолорбут аныгы муода таҥаһын курдук эмиэ, аныгы аска таттаран атыылаһаллара элбээбитэ баар суол.
Бүгүҥҥү тэрээһиммитигэр кырачааннарбыт харахтарынан көрөн, илиилэринэн тутан билэллэрин туһугар, доруобай уонна буортулаах астар диэн бэртээхэй быыстапка тэрийдибит. Олохтоох библиотека сэбиэдиссэйэ Мария Расулова доруобай аһылык, Сахабыт сирин эмтээх отторун туһаларын туһунан кинигэ быыстапкатын бэлэмнээн көрдөрдө. Кэлбит ыҥырыылаах ыалдьыттарбыт, бэтэрээн учууталларбыт, элбэх оҕолоох, сиэннэрдээх эбэлэрбит, эһэлэрбит оҕолорго, төрөппүттэргэ анаан, бэйэлэрин дириҥ уопуттарыттан сүбэ — ама биэрдилэр, наадалаах бэсиэдэлэринэн тэрээһиммитин суолталаатылар. Оҕолору, төрөппүттэри кэпсэтиигэ сыһыаран, ас тематыгар, иитиигэ араас боппуруостар бэрилиннилэр, оҕолорбут иннибэккэ, дириҥ толкуйдаах бэртээхэй хоруйдары биэрдилэр.
Бу курдук инникитин өссө туһалаах тематическай биэчэрдэр, диспуттар, аһаҕас кэпсэтиилэр буола туралларыгар баҕарабыт. Бэйэ оҥорон таһаарар продукцияларын, ол курдук бастатан туран, эппитин, балыкпытын, үрүҥ ас арааһын, иҥэмтэлээх, битэмииннээх сир аспытын аһаан, чөл, доруобай буолуоххайыҥ диэн ыҥырабыт.
Марианна Сивцева