Хоту дойду хоһуун уола, эбээн омук суруйааччыта, РСФСР уонна Саха АССР Үрдүкү сэбиэтин, кэлин Ил Түмэн депутатынан талыллан үлэлии сылдьыбыт саха норуодунай суруйааччыта, өр сылларга Хотугу норуоттар Ассоциацияларын салайбыт, Орөспүүбүлүкэ, Кэбээйи улууһа бочуоттаах олохтооҕо, биир дойдулаахпыт Андрей Васильевич Кривошапкин быйыл олоҕун бэлиэ сыла.
Ытык киһибит үбүлүөйүн бэлиэтээн, нэһилиэкпитигэр араас тэрээһиннэр ыытылыннылар. В.Е.Колмогоров аатынан оскуола учууталлара үөрэнээччилэргэ суруйааччы олоҕун, айар үлэтин туһунан кылаас чаастарын ыыттылар, презентация көрдөрүлүннэ. Үөрэнээччилэр Андрей Кривошапкин айымньыларынан уруһуй күрэҕэр кытыннылар (сал. О.Ф.Левина.). Олохтоох библиотекаҕа «Хоту дойду хоһуун уола» диэн киэҥ дириҥ ис хоһоонноох кинигэ быыстапката тэрилиннэ, суруйааччы айымньыларын ырытыы, ааҕыы ыытылынна. Үрдүкү кылаас үөрэнээччилэригэр библиотечнай уруоктар ыытылыннылар. Орто Халыма Ойуһардаах нэһилиэгиттэн төрүттээх норуот маастара, үлэ, тыыл бэтэрээнэ,Сииттэ нэһилиэгин бочуоттаах олохтооҕо Вера Егоровна Оконешникова тикпит оҥоһуктарынан хоту дойду норуота туттар малын, таҥаһын-сабын көрдөрөр анал быыстапка тэрилиннэ.
Алтынньы 17 күнүгэр В.Е. Колмогоров аатынан оскуолаҕа биир дойдулаахпыт Андрей Васильевич төрөөбүтэ 85 сылыгар аналлаах үөрүүлээх линейка буолла. Киирии тылы оскуола директора Андрей Викторович Новгородов үөрэнээччилэргэ А.В. Кривошапкин туһунан үтүө тылынан, Ытык киһибит айар үлэтин, депутат быһыытынан үлэлии олорон, Сииттэбит нэһилиэгэр туруорсубут, үлэлэспит үлэтин, махтанан ахтан-санаан ааста. Саха тылын уонна литературатын учуутала Мария Александровна Яковлева суруйааччы олоҕун туһунан сиһилии билиһиннэрдэ. Олохтоох библиотека үлэһитэ Мария Обутова үөрэнээччилэргэ туһаайан биир дойдулаахпыт, норуодунай суруйааччы Андрей Васильевич Кривошапкин аатынан киэн туттарга, айымньыларын ааҕарга, үөрэтэргэ ыҥырда.
Салгыы үөрэнээччилэр Гуляева Ира, Степанов Вася, Павлов Коля, Петрова Василина, Тимофеева Оля суруйааччы хоһооннорун дорҕоонноохтук аахтылар. Оскуола социальнай учуутала Римма Анатольевна Винокурова эбээннии тылынан поэт хоһоонун аахпытын оҕолор сэргии иһиттилэр. Үҥкүү бөлөҕүн (сал. Мария Захарова) толоруутугар хотугу норуоттар үҥкүүлэрин дохсун ытыс тыаһынан көрүстүлэр. Бу сэргэх тэрээһини оскуола иитэр-үөрэтэр чааһын завуһа Туйаара Александровна Никитина иилээн-саҕалаан ыытта.
Мария Обутова, Сииттэ нэһилиэгэ