Сииттэбит нэһилиэгэр аҕам саастаахтары эҕэрдэлиир бэрт сэргэх тэрээһин буолан ааста. Олохтоох дьаһалта баһылыгын солбуйааччыта Пётр Степанов ис сүрэҕиттэн тахсар тыллардаах эҕэрдэ тылларынан бырааһынньыгы үөрүүлээхтик арыйда. Тэрээһини ылбаҕай ырыаларынан, хомус алыптаах тыаһынан, олоҥхону оройуттан тутан кэлбит күндү ыалдьыттарбытыгар бэлэх ууннубут.
Көрөөччүлэрбитин эдэр ыччаттарбыт — Дима Охлопков, Нария Иванова, Мария Новгородова, Афанасий Гуляев уонна хомусчут кыргыттар Күннэй Сивцева, Айта Горохова, ону тэҥэ сыана бэтэрээнэ Николай Захаров олус истиҥник эҕэрдэлээтилэр. Бүгүҥҥү күҥҥэ дьиэҕэ муунтуйан олорон хаалбакка, кэрэҕэ-сырдыкка тардыһан, суолта ууран кэлбит көхтөөх ыалдьыттарбытыгар олохтоох култуура дьиэтин үлэһиттэрин ааттарыттан барҕа махталбытын тиэрдэбит.
Бүгүҥҥү тэрээһини эдэр үлэһиттэр бэлэмнээн, тэрийэн ыыттылар. Ол курдук, өркөн өй күрэҕин олохтоох библиотека сэбиэдиссэйэ, саҥа үлэһит Мария Расулова интэриэһинэйдик уонна сэргэхтик ыытта. Нэһилиэкпит социальнай харысхалын үлэһитэ Елена Васильева кырдьаҕастарыгар, соҕотох олорооччуларыгар өрүү болҕомто ууран, көрөрүгэр-истэригэр барҕа махталларын тириэртилэр. Киһиэхэ кыра да болҕомто билиҥҥи кэмҥэ олус улахан суолталаах.
Араас оонньуулар, толору минньигэс астаах остуол тула олорон, итии үүттээх чэй иһэ-иһэ, өр көрсүбэтэхтэрин ахтыһан, күннээҕи түбүктэрин, сайыҥҥы баай-талым оҕуруоттарын үүнүүтүн туһунан токкоолостулар, мас-от үлэтин туһунан астына сэһэргэстилэр. Үчүгэй тыллардаах баҕа санааларын бар дьонноругар анаатылар, эҕэрдэ ырыа алыбын бэлэхтэстилэр.
Өссө төгүл нэһилиэкпит аҕам саастаахтарын бука-барыгытын эҕэрдэлиибит. Сааһырдыбыт диэн санаарҕаабакка, кырыйдыбыт диэн кыыһырбакка, дьоллоох олоҕу баҕарабыт, доруобай, чэгиэн сылдьыҥ. Декада чэрчитинэн эрэ буолбакка, нэһилиэкпит тэрилтэлэрэ анал былааннарынан сылы быһа болҕомто ууран, күүс-көмө буола олороллор. Бу эмиэ буоларын курдук, тэрилтэлэр истиҥ эҕэрдэлэрин, бэлэхтэрин туттаран, аҕам саастаах көлүөнэлэрбитин олус үөртүлэр.
Марианна Сивцева