Сиэгэн-Күөл нэһилиэгэр Үлэ, Саас уонна Күөх Маай бырааһынньыгын үрдүк таһымнаахтык бэлиэтээтилэр. Тэрээһин үтүө үгэс быһыытынан нэһилиэк иһинээҕи субуотунньуктан саҕаланна. Олохтоохтор уонна тэрилтэлэр үлэһиттэрэ Суол Билиилээх күөл кытылыгар турар 7 чекистэр пааматынньыктарын таһын ыраастаатылар.
Субуотунньук кэнниттэн спортивнай күрэхтэһиилэр буоллулар. Манна нэһилиэк сүрүн тэрилтэлэрин хамаандалара күөн көрүстүлэр:
- Нэһилиэк дьаһалтата;
- «Хатынчаан» оҕо уһуйаана (МБДОУ);
- Сиэгэн-Күөл орто оскуолата (МБОУ);
- врачебнай амбулатория;
- ЖКХ;
- АДЭС.
Тэрээһин сүрүн сыала — кыайыылаахтары быһаарыы эрэ буолбакка, тэрилтэлэр икки ардыларыгар доҕордуу сыһыаны бөҕөргөтүү, чөл олоҕу тарҕатыы уонна олохтоохтору түмүү буолар.
Күрэхтэһии бырагыраамата бэрт сэргэх уонна араас көрүҥнэрдээх этэ, кыттааччылар күүстэрин-уохтарын уонна өйдөрүн тургутан көрдө:
- Түһүлгэни киэргэтии: хамаандалар бэйэлэрин былаһааккаларын креативнайдык, фантазиялаахтык уонна истииллээхтик киэргэттилэр.
- Кулинарнай күрэс: астан бүлүүдэ амтана, уратыта уонна киэргэтиллиитэ сыаналанна.
- Маһы хайытыы: түргэн-тарҕан туттуулаах эр дьон күрэхтэрэ.
- Туристическай эстафета: хамаанданан арахсан, кутаа оттон, чэй оргутуута.
- Творческай нүөмэр: Саас уонна Үлэ туһунан ырыа, үҥкүү, сценка курдук чаҕылхай нүөмэрдэр.
Бириис пуондатын хаҥатар туһуттан хас биирдии хамаанда 1000 солкуобай усунуос укпута. Тыҥааһыннаах киирсии кэнниттэн оҕо уһуйаанын уонна врачебнай амбулатория үлэһиттэрин холбоһуктаах хамаандата кыайыылааҕынан таҕыста. Кинилэргэ анаан муспут бириистэрин туттардылар.
Тэрээһиҥҥэ кыттыбыт дьон бары үөрүү-көтүү, сэниэлэммит-эрчимнэммит санаалаах тарҕастылар.
Анна Иванова