Быйыл эмиэ ыам ыйыттан 14 -тэрин туолбут оскуола оҕолоро П.А . Кейметинов аатын сүгэр Сэбээн-Күөллээҕи таба иитэр «Себян» МУТ кытта үлэ сөбүлэҥин түһэрсэн, сайыҥҥы сынньалаҥнарын таба ыстаадаларыгар табаһыттарга көмөлөһө сырыттылар. Сайын кэлиитэ, өрүү соҕурууттан кэлэр көтөрдөрдүү, оҕолор кэлэн табаһыттар сүргэлэрин өрө көтөҕөллөр.
Ыстаада олоҕо оҕо саҥатынан туолар. Ону тэҥэ саҥа төрөөбүт кырачаан тугуттар эмиэ бэйлэрин курдук оҕолору көрөн оонньууллара-сүүрэллэрэ элбиир. Дьэ уонна ыстаада олоҕо тиллибиттии сэргэхсийэр. Оҕолор кэллэ кэлээт түүннэри, күнүстэри, ардах буоллун, кумаардаах түүннэр буоллуннар, табаһыт олоҕор лаппа киирэллэр.
Саҥа миинэр табалары айаһалаабытынан саҕалыыллар. Бу уолаттары кытта тэбис тэҥҥэ кыргыттар эмиэ бааллар. Кыратыттан ыстаадаҕа сылдьан улааппыт буолан, уолаттартан хаалсыбаттар, өссө төһө эмэ ордуктар. Уолаттар саллар аттарын кытта мөхтөртөөн, үөлээннээхтэрин санааларын самнартыыр.
Дьэ ити курдук сайын барахсан эмиэ да уһуҥҥа да дылы. Номнуо ааһа охсон оҕолору сонньутар. Сайын бүтэн оскуолаҕа барыы тирээн бу тиийэн кэлэр. Хомойуу да, харах уута да кистээн сонньуйуута буолар.
«Этэҥҥэ үөрэнээриҥ!» — диэбитинэн хааллылар.
«Этэҥҥээ!» — оҕолор саҥалара ырааттар ыраатан, эмиэ туланы чуумпу барахсан ылла.
Балаҕан ыйын 26 күнүгэр хаһаайыстыба салайааччыта Л.В. Бурцева уу харчыннан хамнастарын төлөөн, оҕолору өссө үөртэ.
Иннокентий Бурцев