Тыайаҕа «Күндээдэ» ЖСПК 2009 сыллаахха тэриллибитэ. Бастаан утаа сүөһү ахсаана үгүһэ. Онтон сыыйа, дьон-сэргэ сүөһүтүн аччатан, билигин тарбах эрэ ахсаанынан ыал хотоннорун тутан олороллор. Онон, сүөһүнү иитии, дэлэтии баҕа санааҕа эрэ хаалыах курдуга.
СХППСК-ны 2024 сылтан тыа хаһаайыстыбатын специалиһа Александр Лугинов салайар. Үлэҕэ киирээт сүөһү атыылаһар баҕаттан, грант суруйан кыайыылаах буолбута. Дьэ, бу ыратын ситиһэн, инники ылыллыбыт субсидияҕа эбэн, өссө хас да сыл сыралаһан туран бэлэмнэнэнэн, түбүгүрэн, 100 төбө сүөһү турар дьоһун хотону үлэҕэ киллэрдэ. Нэһилиэкпит эдэр, кэскиллээх санаалаах салайааччы хотонугар Кэбээйиттэн А.В. Левина салайар «Ворошилов» учаастагыттан 38 ынах, маннааҕы ыаллартан 5 ынах, 4 борооску, 6 ньирэй ылан олохтоото. Хотону тутууга сүрүннээн Саша төрөппүттэрэ, убайдара, таайдара, эдьиийдэрэ көмө-тирэх буолбуттарыгар махтала улахан.
Дьоро күнү «Түмсүү» сынньалаҥ киинин үлэһиттэрэ Тыа хаһайыстыбатын күнүгэр сөп түбэһиннэрэн тэрийдилэр. Чаҕыл күннээх сарсыарда үрүҥ илгэ үрүлүйүөхтээх ытык сирбитин «Кэбээйи» совхоз Тыайатааҕы отделениетын солбуллубат үлэһитэ Афанасий Егорович Полятинскай ыллыктаах тылынан аал уотун оттон алгыһын анаата. Кэлбит ыалдьыттартан отделение биир тарбахха баттанар салайааччыта Семен Спиридонович Полятинскай, нэһилиэкпит баһылыга Сидор Сидорович Дьяконов, тэрилтэлэр, түмсүүлэр салайааччылара эҕэрдэлээтилэр, боччум бэлэхтэрин туттардылар.
СХППСК салайааччыта хоруй тылын этэн туран, ытык дьоммут аалай кыһыл лиэнтэни кырыйан, ааныгар баайыллыбыт саламаҕа алгыстаах лиэнтэлэри иилэн арыйдыбыт.
Киирэн сүөһүлэри көрдүбүт, сахалыы астаах дьоҕус сандалы тула тоҕуоруһан, «Күндээдэ» ансаамбылын ырыаларынан доҕуһуолланан ньирэйдэри үрүҥ аһынан мааллаан ыллыбыт, малааһыннаатыбыт, алгыс тылларбытын анаатыбыт.
Инникитин бу кэскиллээх санаа өссө даҕаны күүстээхтик сайдан, үтүмэн үгүс ситиһиилэнэригэр баҕарабыт.
Екатерина Архипова