Дьокуускай куораттан Куокуй нэһилиэгин дьаһалтатын салайыытынан пластик турбалары тиэммит массыыналар кэллилэр. Бу — «ППМИ-2025» бырайыак чэрчитинэн ыытыллар үлэ саҕаламмытын бэлиэтэ.
2025 сыллааҕы куонкуруска Куокуй нэһилиэгин дьаһалтата «Сайыҥҥы уу проводын эргэрбит тимир турбаларын пластик турбаларынан солбуйуу» диэн бырайыагынан кыттан, үгүс атын бырайыактары кыайан, үп-харчы ылбыта. Бу бырайыак нэһилиэк олоҕор улахан суолталааҕын өйдөөммүт, нэһилиэк олохтоохторуттан кылгас кэм иһигэр үп-харчы хомулунна. Пластик турбалар итиини уонна тымныыны үчүгэйдик тулуйумтуолар, саахал тахсар түгэнигэр уларытыыта судургутун дьон-сэргэ сэҥээрэр.
«Пластик турбалар үйэлэрэ уһун, эрозияҕа утарылаһар кыахтара үрдүк, онон нэһилиэнньэни сайын устата ыраас уунан тохтоло суох хааччыйар кыахтанабыт”, — диэн олохтоох дьаһалта баһылыга Лев Павлов бэлиэтиир.
Сотору кэминэн нэһилиэккэ турбалары уурууга анал биригээдэ тэриллэн үлэни саҕалыаҕа. Куокуйдар эргэ уу ситимин көтүрүүгэ, материаллары сүөкээһиҥҥэ, онтон да араас субботниктарга күүс – көмө буолаллара саарбаҕа суох.
Сайын саҕаланыыта сүрүн үлэни бүтэрии былааннанар.
Надежда Илларионова