Г.К. Егоров салайааччылаах Кэбээйитээҕи кыраайы үөрэтэр түмэл Олоҥхо Ыһыаҕын көрсө 2024 сылтан бэлэмнэнии үлэтин ыытар. Ол курдук, 2024-2026 сс. сылгы кылыттан уонна сиэлиттэн өрүүгэ, туос оҥоһуктары, өттүк симэҕин, кыбытык ньыманан тигиигэ “Айар кыһалары” тэрийэн мастер-класстары тэрийдибит. 2024 с. НВК редактора Сардаана Плотникова “Төлкө түөрэҕэ” биэриигэ Кэбээйи олохтооҕун, Суорун Омоллоон драматын прототибын Күкүр Уус туһунан биһиги түмэлбитигэр документальнай киинэ устубута. 2024 сылтан түмэлбит “Күбэйэ” эбээлэр түмсүүлэрин кытары “Өбүгэ үгэһин сөргүтүү” проегынан дьарыктары тэрийбитэ. 2025 с. Норуот маастарын Софронеева Е.К. уонна Таатта улууһун олоҥхоһуттара Маркова Р.С. уонна Николаев А.Н. тэрийбит “Олоҥхо” лааҕырын оҕолоругар анаан түмэл уруоктарын ыыппыппыт. Кэбээйи олохтоохторугар сахалыы таҥастаах сыахай оҥоруутугар дьарыктары маастар Охлопкова А.П. кытары тэрийбиппит. Түмэлбит Олоҥхо театрын литературнай салаатын сэбиэдиссэйэ М.Н. Власьеваны кытары Кэбээйи нэһилиэгэр кыраайы, норуот уус-уран айымньытын үөрэтээччилэр, төрүт дьарыктаах уустарбыт тустарынан документальнай киинэ устубуппут. “Муҥха олоҥхотун” кэмигэр Олоҥхо Ыһыаҕын ыалдьыттарын Кэбээйи устуоруйатын уонна культуратын кытары билиһиннэрэр сыаллаах Кэбээйитээҕи түмэл “Культурнай Сайдыы киинин” кытта “Ытык сирдэринэн” диэн проегы оҥорон көмүскээбиппит. НВК уонна “Тэтим” радио журналистара кэбээйилэр төрүт дьарыкпыт – балыктааһын бүгүҥҥү кыһалҕаларын, түмэл сүрүн харайааччытын Россия суруйааччыларын союһун чилиэнин, Улуустааҕы “Лена долгуннара” литературнай түмсүү салайааччытын И.Г. Кобяков, түмэл таксидермиһын С.К. Эверстов үлэлэрин тустарынан биэрии устубуттара. Историяны сэргиир оскуола оҕолоро түмэлбит экспонаттарын чинчийэннэр, “Инникигэ хардыы”, “Барҕарыы” НПК-ларга ситиһиилээхтик кытталлар. Ону таһынан түмэл сыллата “Репинскэй ааҕыылар” диэн Улуустааҕы поисковай-исследовательскай конференциялары тэрийэн ыытар. 2025 сыллааҕы конференциябыт Кэбээйи улууһун олоҥхоһуттарын олохторун, олоҥхолорун уонна нэһилиэктэр үһүйээнэрин, номохторун үөрэтиигэ анаммыта. 2026 с. Олоҥхо Ыһыаҕар аналлаах 16-с Республиканскай научнай-методическай конференцияҕа түмэлбитигэр сылгы сиэлиттэн сэлэ оҥоруутугар мастер-класс, көмүс уонна тимир уустарын Төгүрүк остуоллара, балыктааһыҥҥа туттуллар тэриллэри бэлэмнээһиҥҥэ аналлаах семинар-мастер-класс уонна түмэл бэлэмнээн таһааттарбыт “Кэбээйи түөлбэтин фольклора” кинигэ сүрэхтэниитэ үрдүк таһымнаахтык ааспыттара. Максимова А.А. “Кэбээйи улууһугар фольклору, олоҥхону, олоҥхоһуттары уонна кыраайы үөрэтии” диэн секцияҕа дакылааттаах кыттыбыта. Саха сирин норуотун маастара Софронеева Е.К. салайааччылаах “Иис абылаҥа” биһиги түмэлбитин кытары ыкса үлэлииллэр. Олоҥхо Ыһыаҕар бэлэмнэнии чэрчитинэн үгүстүк түмэл Олоҥхо хоһугар иистэнньэҥнэрин мунньан үлэлээбиттэрэ. Түмэллэр Аан дойдутааҕы күннэригэр аналлаах нэдиэлэҕэ “Мичээр” уһуйаанын иитиллээччилэригэр туустаах тиэстэттэн кытыйа оҥорорго музейнай дьарык ыыппыппыт, “Эбээ холбуката” күлүк театрын түмсүүнү кытары “Быһыйа Боотур” олоҥхону кырачаан оҕолорго көрдөрбүппүт. Ону таһынан түмэл иһинэн үлэлиир “Эдэр историк” куруһуок оҕолорун — шефтэһэр 8Б кылаастары кытары түмэлбит урукку директора Е.А. Павлов уонна үлэ ветерана С.Т. Левин “Оҕус тириитэ” диэн “Ытык сиргэ” баран экскурсиялаан уонна ыраастаан кэлбиттэрэ.
Түмэл үлэһиттэрэ Олоҥхо Ыһыаҕын тэрээһиннэригэр тутуу, ыраастаныы үлэлэригэр көхтөөхтүк кытыннылар. Ити курдук П.Д. Степанов аатынан Кэбээйитээҕи кыраайы үөрэтэр түмэл буолаары турар кэтэһиилээх, долгутуулаах Олоҥхо Ыһыаҕын көрсө элбэх үлэни ыытта.
Айталина Максимова, түмэл үлэһитэ.