От ыйын 1 күнэ. Эбиэт кэмэ. Кэбээйибит улууһун киэн сириттэн, араас муннуктарыттан хомулламмыт Нерюнгри сиригэр XVIII республикатааҕы оОлоҥхо ыһыаҕар уопсайа 25 киһи (салайааччылар, культура эйгэтин специэлистэрэ, общественниктар) туруннубут. Эбэни туорааммыт вокзалга муһуннубут. Элбэх көлөһөлөөх тимир көлөнөн — поеһынан айаннаатыбыт. Сорох дьоммут нэһиилэ баттаһа поезд аана сабыллыан аҕай иннинэ кэллилэр. Дьоммут купеларын булалларыгар көмөлөстүбүт. Бары биир кэлимсэ “Кэбээйи” диэн суруктаах таҥастаах буоламмыт бэйэ бэйэбитин түргэнник булсабыт.
От ыйын 2 күнэ. Сарсыарда 10 чаас. “Нерюнгри” вокзалга кэллибит, олохтоохтор араас делегациялары сахалыы үҥкүүнэн уруйдуу көрүстүлэр, бары төбүрүөннээн тураммыт оһуокайга кыттыстыбыт. А. С. Пушкин аатынан культура, духуобунас киинигэр делегациялар регистрацияны аастыбыт. Хас биирдиибитигэр бейджик биэрдилэр, дьэрэкээн олбох, уруучука, блокнот бэлэх тутаммыт олус үөрдүбүт. Араас улуустары, НВК суруналыыстарын кытта 13 №-дээх оскуолаҕа түстүбүт. Тустаах эппиэтинэстээх дьоннор усулуобуйаны төһө кыалларынан тэрийбиттэр эбит. Сарсыарда, киэһэ киэҥ-куоҥ остолобуойдарыгар араас иҥэмтэлээх, минньигэс астарынан бэрт элэккэй асчыттар бэлэмнээн аһаталлар. Чөкө, ыраас куорат историческай, бэлиэ сирдэринэн экскурсиялаатыбыт. Олохтоохтор хардыы аайы үтүөнү баҕара сылдьаллара сөхтөрөр. Бары араас тэрээһиннэргэ бэлэмнэнэбит. Илиилэригэр бэрт талааннаах норуот маастардарын Софронеева Е.К. (Кэбээйи), Эверстова М.Н. (Чагда) кытта араас уобарастары ситэрэн-хоторон оҥорууга көмөлөстүм.
От ыйын 3 күнэ. Делегациябыт сорох дьонноро массыынанан айаннаан кэллилэр. 5 чааска автобуска олороммут түһүлгэҕэ киирдибит. Сивцева А. Г. иккиэн уустар түһүлгэлэрин арыллыытыгар сырыттыбыт. Уһуна суох эрээри дириҥ ис хоһоонноох тэрээһин эбит. Чурапчы улууһа иилээн-саҕалаан тэрийдэ. Түҥ былыргы эйгэҕэ тиксэн хаалбыт курдук буоллубут. Уотунан уһуура сылдьар хамсаныылары көрдүбүт. Ити курдук бары араас түһүлгэлэри үллэстэммит көрдүбүт-иһиттибит. Сибээс баран хаалла. Киэһэ бары мустаммыт тэрээһин уопсай түмүгэр, сабыллыытыгар хайдах кыттарбытын күргүөмүнэн сүбэлэстибит, бэлэмнэннибит.
От ыйын 4 күнэ. 11 чааска киин түһүлгэҕэ «ПОКА СТОЯТ СВЯЩЕННЫЕ ГОРЫ, МИР НЕ РУХНЕТ» диэн сүрүн арыллыыга бардыбыт. Хомноох чааскы иһигэр турар курдук бүтэй, ытык Таастаах диэн сиргэ тиийдибит. Үөһээттэн түһэн иһэн көрдөххө Сангаарбыт Таас Дьааҥытын санатар хайалардаах эбит. Эмиэ да ураты, эмиэ майгынныыр хартыына. Уруурҕуу санаатым. Делегация дьонун анал сиргэ олортулар. Хас биирдии ыалдьыты олбоҕунан, үтэһэлээх этинэн, быырпаҕынан күндүлүүллэр. Араас омук дьоно сахалыы таҥастаах, симэхтээх үөрэ көрсөр. Эчи үчүгэйин! Дьон сүргэтэ көтөҕүллэр. Арыллыытыгар Нерюнгри дьоно күргүөмнээх, айымньылаах үлэлэрэ, сомоҕолоһуулара, ис кыахтара арылынна диэн сыаналыыбын. Дириҥ ис хоһоонноох тэрээһини биир тыынынан көрөҕүн.
Кэбээйилэри Беркакит түһүлгэтигэр ас тардан көрүстүлэр. Эбиэттээн бараммыт маастардар куораттарыгар сырыттыбыт. Ил Дархан А. С. Николаев хас биирдии улуустар түһүлгэлэрин, быыстапкаларын көрдө. Биһиги маастардарбыт үлэлэрин сэҥээрдэ, интэриэһиргээтэ. 4 чааска “Омук төрүт таҥаһа — өбүгэ өйдөбүнньүгэ” көрүү-күрэххэ норуот маастара Эверстова Мария Николаевна 17-18 үйэтээҕи өбүгэ таҥастарын көрдөрөн дьүһүйүүгэ кыттаммыт олус дуоһуйдубут. Көрөөччүлэр ытыс таһыныылара киһини кынаттыыр. Маастарбыт иккис бочуоттаах миэстэҕэ тигистэ.
От ыйын 5 күнэ. Оһуокай уонна һээдьэ түһүлгэлэригэр кытынныбыт. Киэһээ Олоҥхо ыһыаҕын өрөгөйдөөх сабыллыытыгар олус долгутуулаах, эппиэтинэстээх түгэн үүннэ. Дуоҕаны туттарсыы түһүмэҕэр биһиги делегация күргүөмүнэн кыттыыбыт бэйэтэ ураты хатыламмат көстүү, дьүһүйүү буолла.
От ыйын 6 күнэ. 5 чааска поездка олордубут.
Ытык Нерюнгри сирин дьонун-сэргэтин кытта Кэбээйи делегацията салгыы ситимнэһиэх буолан илии тутуһан араҕыста.
Им Ия Николаевна, Россия суруналыыстарын сойууһун Кэбээйи улууһун бастакы сүһүөх тэрилтэтин председателэ, Мукучу модельнай библиотекатын сэбиэдиссэйэ.