Өрөспүүбүлүкэтээҕи норуот айымньытын Дьиэтин тэрээһининэн «Олоҥхо дойдутун геройдара» диэн Аҕа дойду сэриитин кыттыылаахтарыгар – культура эйгэтигэр үлэлээбит ветераннарбытыгар аналлаах электроннай кинигэ сүрэхтэниитэ телемост быһыытынан буолла.
Бу электроннай кинигэҕэ Кэбээйиттэн Дмитрий Петрович Обутов киирдэ. 1941 сыллаахха Кэбээйигэ кулууп дьиэтин тутуута саҕаламмыт. Төһө да сэрии саҕаланнар, Улуу Өктөөп 28-с сылын көрсө кулууп үлэҕэ киирбитэ уонна кулууп бастакы сэбиэдиссэйинэн комсомолец Обутов Дмитрий Петрович ананан, 1942 сыл сайыныгар диэри үлэлээбитэ. Дмитрий Петрович Ийэ дойду көмүскэлигэр 1942 с. Кыһыл Армияҕа ыҥырыллан фроҥҥа барар. Кини сэриини Кавказ оборонатыттан саҕалаан, Эльба өрүскэ тиийэн өстөөҕү кыайыынан түмүктээн, 1946 с. “Кавказ оборонатын иһин”, “Бойобуой үтүөлэрин иһин”, “Берлини ылыы иһин”, “Варшаваны босхолооһун иһин”, “Германияны кыайыы иһин” диэн бойобуой мэтээллэрдээх, “Гвардеец” бэлиэлээх дойдутугар эргиллэн кэлбитэ. Кэлин “Аҕа дойду сэриитин” I ст. уордьанынан, “В. И. Ленин төрөөбүтэ 100 сылын көрсө килбиэннээх үлэтин иһин” мэтээлинэн, элбэх юбилейнай мэтээллэринэн, пятилеткалар кыайыылаахтарын бэлиэлэринэн, Саха АССР Үрдүкү Сэбиэтин Бочуотунай грамотатынан, Монголия Норуодунай Республикатын Улуу Хуралын, РФ бастакы Президенэ Ельцин Б. Н. эҕэрдэ суруктарынан, тэрилтэлэр элбэх Бочуотунай грамоталарынан, хайҕал, махтал суруктарынан наҕараадаламмыта.
Бу телемостка Дмитрий Петрович оҕолоро: куораттан А.Д. Григорьева, Кэбээйиттэн В.Д. Обутов, Д.Д. Обутов кэргэнинээн, П.Д. Степанов аатынан Кэбээйитээҕи кыраайы үөрэтэр түмэл уонна Г.Г. Кобяков аатынан Кэбээйитээҕи модельнай библиотека үлэһиттэрэ кыттыннылар. Бу электроннай кинигэ сүрэхтэниитигэр 5 улуус кыттыыны ылла. Телемост Улуу Кыайыы 80 сылын көрсө кэбээйилэргэ өссө биир бэлиэ тэрээһининэн буолла.
Григорий Егоров, түмэл директора