Куйаар ситиминэн анал дьайыы уотун-күөһүн, кыһалҕатын түөстэринэн тэлэ сылдьар биир дойдулаах байыастарбыт көрдөһүү ыыппыттарын тутаннар, Кэбээйи нэһилиэгин “Үтүө түгэн” анал дьайыы волонтердарын түмсүүтэ (салайааччы Т.Д. Максимова) тутатына “Дорога жизни” диэн ааттаан аахсыйа тэрийэн ыыттылар. Аахсыйаны улуус үрдүнэн тэрийэннэр нэһилиэктэр олохтоохторо кыттыыны ыллылар.
Маны сэргэ “Үтүө түгэннэр” Илин Сибиирдээҕи Росрыболовство ТУ салайааччытын эбээһинэһин толорооччу Эдуард Алексеевич Родионовтыын сибээстэһэннэр бу аахсыйаҕа кыттарга ыңырдылар. Ити кэпсэтии түмүгэр, өрүү да анал дьайыы кыһалҕатыттан туора турбат тэрилтэ, салайааччыларын көҕүлээһининэн балачча көмөнү түмтүлэр. Бу тэрилтэ бэйэлэрин кылааттарын 31 980 солкуобайы уганнар аахсыйаҕа кыттыстылар уонна Эдуард Алексеевич бэйэтэ чааһынай 7 илимин биэрэн туран өйөөтө. Бу хамсааhын сураҕын истэн Карпова Лена Николаевна салайааччылаах Бүтүн арассыыйатааҕы балык хаһаайыстыбатын научнай чинчийэр институтун кэллэктиибэ илимнэри түмтүлэр.
Кэбээйи улууһа аахсыйа5а 82 500 солкуобайы хомуйан, Эдуард Алексеевичка ыытан анал дьайыыга олус наадалаах, туһалаах, элбэх байыас олоҕун араңаччылыырга аналлаах илимнэри атыылаһаннар, барытын биир сиргэ түмэннэр Анна Николаевна Ефимова салайааччылаах “Якутия с тобой” уопсастыбаннай түмсүүгэ уопсайа 69 киилэлээх илими туттардылар. «Биһиэхэ илимҥэ сакаас өрүү киирэр. Ол гынан баран биһиги түмсүү үппүт-харчыбыт татым. Онон бу «Дорога жизни» аахсыйа олус тоҕоостоох кэмҥэ тэриллэн ыытылынна», — диэн Анна Николаевна тоһоҕолоон бэлиэтээтэ. «Кэбээйилэргэ махтал уонна бу аахсыйаны өйөөбүт рыболовства тэрилтэлэригэр махтанабыт. Бу сыаналаах, наадалаах баһыылка бу күннэргэ анал дьайыы хонуутугар айанныаҕа», — диэн Анна Николаевна баһыылка туттарыытын кэмигэр эттэ.
Россияҕа балыктааһын хаһаайыстыбатын бэтэрээнэ, СӨ айылҕа харыстабылын үтүөлээх үлэһитэ Эдуард Алексеевич санаатын эттэ: “Анал дьайыы волонтердара да, биирдиилээн дьон даҕаны аат-суол, биллэ-көстө сатааһын, дьонтон чорбойуу туһугар маннык үтүө санаа ааксыйаларын көҕүлүүр, кыттар уонна ону куйаар ситимигэр сырдатан дьон болҕомтотун бэйэҕэ тардар сыаллаах буолбатахпыт. Биһиги сорукпут биир: сомоҕолоһуу, дьону түмүү, кыайыыны уһансарга норуоту көҕүлээһин буолар”.
Кэбээйи нэһилиэгин анал дьайыы волонтердара аахсыйаҕа кыттыыны ылан кыайыыга кылааттарын килэрэ турар Кэбээйи улууһун олохтоохторугар, Э.А.Родионов салайааччылаах Илин Сибиирдээҕи Росрыболовство ТУ тэрилтэтигэр муңура суох махтаналлар. Бары бииргэ буоллахпытына кэккэбит хаңыаҕа, күүспүт бөҕөргүө.
Татьяна Максимова-Лазарева