Олоҥхо эйгэтэ — олоҥхо сирэ уота, дьоно- сэргэтэ, көтөрө-сүүрэрэ, айгыр силик айылҕата… Олоҥхо көмөтүнэн тыл кустук курдук дьэрэкээн өҥнөөҕүн, дьэдьэн курдук минньигэһин, эккэр-хааҥҥар киллэрэн, куккар сүргэр иҥэрэҕин.
Олоҥхо киһи санаатын сааһылаан, этиэн баҕарбытын толору, лоп-бааччы уус-уран тылынан дьоҥҥо тиэрдэр.
Олоҥхоттон тыл кэрэтин, ууһун-уранын сүрэххэр-быаргар иҥэриннэххэ эрэ, ыраас санаа ылбаҕайдык ыпсарыллан, кэрэ санааҥ ылбаҕайдык ыпсарыллан, кэрэ санааҥ хомоҕойдук хоһуллан, санааҥ хоту киһи сайдан, үрдээн иһэригэр көмөлөһөр.
Сэтинньи ый Олоҥхо ыйыгар ананар. Кэбээйи улууһун Куокуй нэһилиэгэр Олоҥхо декадата саҕаланна. Олохтоох Тимофей Сметанин аатынан модельнай библиотека сэбиэдиссэйэ Варвара Никифоровна Спиридонова, олохтоох оскуола библиотекаря Антонина Петровна Павлова тэрийиилэринэн «Олоҥхону ааҕабыт» диэн марафоҥҥа нэһилиэкпит тэрилтэлэрин үлэһиттэрэ актыыбынай кыттыыны ыллылар. Оскуолаттан Мария Гуляева, ветеринарияттан Людмила Игнатьева «Күннэй» маҕаһыын сэбиэдиссэйэ Анастасия Игнатьева, «Угуйаан» култуура киинин үлэһиттэрэ Зоя Гуляева, Саргылана Спиридонова, Дмитрий Сметанин, кыраайы үөрэтээччи Геннадий Иванов, «Туосчаан» куруһуок салайааччыта Оксана Игнатьева, кырдьаҕастар түмсүүлэрин салайааччыта Нина Олесова.
12 араас олоҥхолортон быһа тардан аахтылар. Былатыан Ойуунускай «Дьулуруйар Ньургун Боотур», Сергей Васильев — «Эрчимэн Бэргэн», Афанасий Федоров «Тимир Куйахтаах Турантай Бухатыыр», Тоҥ Суорун-Дыырай Бөҕө, Булааҥкый Боотур уо. д. а.
Дьоммут-сэргэбит Олоҥхо эйгэтигэр киирэҥҥит, ааҕаҥҥыт толкуйгут тобулуннун, санааҕыт сайыннын, билиигит эбилиннин.
Сонуннарга анаан Полина Жергина.