Саха киһитэ өр кэтэһэр күүтүүлээх кэрэ кэмэ сайын салаллан кэлбитинэн, ыам ыйын 22 күнүгэр Кэбээйибит нэһилиэгин сынньалаҥ пааркатыгар, Ньукуолун күнүн бэлиэтээтибит. Сирбит-дойдубут сааскы ууттан угуттаннан, чэмэлкэй күнтэн күүс ылан, ситэн-тупсан киэркэйэн, куйаас күн туран биэрдэ. Сайылык – диэн саха норуота былыр-былыргыттан олохтообут үтүө үгэһэ. Бу бырааһынньык томороон тымныылар кэннилэриттэн айылҕа уһуктар, тыллар, силигилии ситэр, үрүҥ тунах үрүйэлии устар кэмэ күүтүүлээх сайыммыт кэлбитин туоһулуур.
Ол курдук, Кэбээйибит дьоно-сэргэтэ, аҕам саастаахтара мустан, Ньукуолун сиэрин-туомун толорон, алгыстаах алаадьынан эбэни аһаттылар, “Самаан сайыны уруйдуоҕуҥ” эҕэрдэ кэнсиэр көрөөччүлэр болҕомтолорун тарта, сахабыт сиригэр оһуохай күнэ бэлиэтэнэринэн сибээстээн, оһуохай түһүлгэтэ төрүттэннэ,
“Сайылык көрдөөх оонньуулара” тэриллэн ыытыллынна. Эҕэрдэ кэнсиэркэ “Күбэйэ” эбээлэр вокальнай ансаамбыллара, “Сардаҥа” үҥкүү бөлөҕө, аҕам саастаахтартан – Евдокия Слепцова, Валентина Сивцева үөлээннээхтэрин эҕэрдэлээн туран ырыа бэлэх ууннулар. “Томтор” СХПК салайааччыта – Софья Кобякова үрүҥ илгэни үрүлүйэ сүүрдээччилэрин, тыа хаһаайыстыбатын үлэһиттэрин эҕэрдэлээн туран, “Сайылык” ырыаны бэлэх уунна.
Ньукуолун тэрээһинин кыттыылаахтара сахалыы сандалы остуолга олорон кус миининэн күндүлэнэн, итии үүттээх чэйинэн, маанылаах остуолун тула олорон, ирэ-хоро кэпсэтэн, эҕэрдэлэһэн, көрдөөх оонньуулары оонньоон, дууһалыын сырдаан, айылҕа чэбдик салгыныгар дуоһуйа сынньанан Сайылык күнүн бэлиэтээтибит.
Ефросинья Кириллина