Саха Республикатын народнай суруйааччыта, улахан литературнай бириэмийэлэрин лауреата, СР искусствотын үтүөлээх деятелэ, Российскай Федерация культуратын үтүөлээх үлэһитэ, аан дойдуга саха литературатын дьоһуннук ааттаппыт — Николай Алексеевич Лугинов 75 сыллаах үбүлүөйүгэр анаан, Тимофей Сметанин аатынан Кэбээйитээҕи норуодунай тыйаатыр 50 сыллаах үбүлүөйүн тэрээһинин чэрчитинэн, биһиги биир дойдулаахпыт Николай Лугинов суруйуутунан “Таас Тумус” диэн сэһэн – испэктээкилэ көрөөччү биһирэбилигэр таҕыста.
Кэбээйи сирин ураты сахалыы тыыннаах, Таас-Тумус барахсан кэрэ айылҕалаах, Элиэнэ Эбэ Хотун кытылын бэлиэ сиригэр олохсуйан олорбут дьон олохторун кэрдиис кэмнэрин көрдөрөр испэктээкилгэ, режиссер Наталья Иванова туруоруутугар — норуодунай тыйаатыр артыыстара уонна “Сайдам” норуот айымньытын киинин үлэһиттэрэ оруолларын толору арыйан оонньоотулар.
Сэһэн — сүрүн дьоруойа Кэбээйи эбэҥкилэриттэн төрүттээх “Тойбол” оҕонньор эдэр сааһыттан саҕалаан, кырдьар сааһыгар чороҥ соҕотох хаалан олорбут олоҕун эргитэ саныыра уонна кинини кытта алтыһан ааспыт дьоннор дьылҕалара испэктээкилгэ ойууланна. Сүрүн оруолу тыйаатыр артыыһа Климентий Эверстов табыллан арыйбыта көһүннэ. “Айгылла” – оруолугар культура сайдыытын киинин методиһа Григорий Кобяков артыыс быһыытынан бастакы холонуутугар толордо, “Михей” оруолун – Кэбээйитээҕи баһаарынай чаас үлэһитэ Прокопий Иванов көрөөччүлэр болҕомтолорун тарта, норуодунай тыйаатыр артыыһа Тихон Алексеев “Киэсэ” оруолугар таба тайанан оонньоото.
Таас Тумус диэн билигин эстибит бөһүөлэк тула, хаһан эрэ Элиэнэ устун төттөрү-таары борохуоттар тиксэн, сынньанан ааһар кытылларыгар күүөстүү оргуйа турбут олох, дьоруойдарын дьылҕаларын, буолан ааспыт түгэннэрин испэктээкилгэ оонньообут бары артыыстар итэҕэтиилээхтик көрдөрдүлэр.
Түмүккэ — саалаҕа мустубут көрөөччүлэр астынан, дохсун ытыс тыаһынан испэктээкил кыттыылаахтарыгар махталларын биллэрдилэр.
Ефросиния Кириллина.
Дьулустан Эверстов хаартыскаҕа түһэриилэрэ.