Олунньу 22 күнүгэр Мукучу нэһилиэгин «Дайан» сынньалаҥ киинигэр Аҕа дойдуну көмүскээччилэр күннэригэр анаан тэрилтэлэр икки ардыларыгар үтүө үгэскэ кубулуйбут «Суһал сулууспа» квест-оонньуу бэһис төгүлүн ыытылынна. Уопсайа биэс тэрилтэ «Кэнчээри» оҕо уһуйаанын, И.Е.Левин аатынан тус предметтэри дириҥэтэн үөрэтэр Танара орто оскуолатын, «Мукучу нэһилиэгэ» ТС, «Сайылык» тыа хаһаайыстыбатын, Оҕо искусство оскуолатын тэрилтэтин эр бэртэрэ сэттэ түһүмэхтээх оонньууга илин-кэлин түһүстүлэр.
Ол курдук биир формалаах, девизтээх, эҕэрдэ нүөмэрдээх кэлэн тэрилтэлэрин билиһиннэриилэрэ, сыал ытыы, гиря анньыы, ырааҕы ыстаныы, сорудаҕы толоруу, хары баттаһыы уонна түмүктүүр хааһыны сиэһин түһүмэҕин олус тыҥааһыннаахтык аастылар. Биирдиилээн ыллахха сыал ытыытыгар кыраҕы харахтаах — 27 очкону ылан Георгий Стрекаловскай тэрилтэтигэр үрдүк көрдөрүүнү бэлэхтээтэ. Маны тэҥэ ырааҕы ыстаныыга Дмитрий Соломонов 2 м 15 см ыстанан тэҥнээҕин булбата. Гиряны Александр Макаров 35 анньан тэрилтэтэ инники күөҥҥэ тахсарыгар биир хардыыны эптэ. Сорудаҕы өйдөөн истэннэр сөптөөх толкуйу ылынаннар Григорий Гуляев, Дмитрий Яковлев сорудах толоруутун тулуппатылар уонна тэрилтэлэригэр олус наадалаах очкону эбэн иннилэрин хоту эрэллээхтик хардыылаатылар.
Уопсай түмүккэ бүтэһик түһүмэххэ күрэх тыҥааһына өссө ордук күүркэйдэ. Ол түмүгэр Үһүс миэстэни аан маҥнай кыттар тыа хаһаайыстыбатын туруу үлэһит уолаттара Григорий Гуляев, Дмитрий Яковлев ыллылар. Иккис миэстэҕэ олохтоох дьаһалта үлэһиттэрэ Александр Макаров, Прокопий Самсонов тахсан үөрүүлэрэ үксээтэ. Муҥутуур кыайыылааҕынан уһуйаан эдэр үлэһиттэрэ Алексей Гуляев, Георгий Стрекаловскай буоллулар. Өрөгөй түгэн тосхойбутунан истиҥник эҕэрдэлиибит.
Бука бары кыттыбыт ону тэҥэ кыайыылаах эр хоһууттарбытыгар үлэлиир тэрилтэлэрэ ону тэҥэ «Дайан» сынньалаҥ киин грамоталары, кубоктары туттартаата, бириистэри бэлэх ууннулар. Эһиилги алтыс төгүлүн ыытыллар күрэххэ өссө элбэх кыттааччыны күүтэбит. Нэһилиэкпит аҕаларын, эр дьоннорун бука барыгытын көхтөөхтүк кыттаргытыгар ыҥырабыт.
Эркин курдук эрэнэр, дурда-хахха буолар эр хоһууттарбытыгар бэйэҕэ эрэли, чэгиэн туругу, бигэ тирэҕи, үрдүк чыпчааллары баҕара хааллыбыт!
Вера Прокопьева, Мукучу