Балаҕан ыйын 16 күнүгэр, Мукучу нэһилиэгэр балыыһа кэлэктиибин ыҥырыытынан, балыыһа кэннинэн эргэрбит, сууллубут олбуор оннугар саҥа олбуору туруорууга көмө субуотунньукка тэрилтэлэр эр дьоно бары биир киһи курдук турунан, күүс-көмө буоллулар.
Бу субуотунньукка эргэ олбуору ыраастааһынтан саҕалаан, саҥа остуолбалары хаһыыга уонна оҥорорго – бары түмсэн, күүс-көмө буолан үлэлээтилэр. Эр дьон бары биир тэҥҥэ үлэлээн, нэһилиэкпитигэр үтүө холобуру көрдөрдүлэр.
Маннык түгэннэр нэһилиэкпит эр дьонун биир сомоҕо буоларын, үтүө дьыалаҕа туора турбатын, күүс-көмө буоларын арылхайдык көрдөрдө. Бу үлэ түмүгэр нэһилиэкпит балыыһатын олбуора саҥардылынна.
Николай Прокопьев, Мукучутааҕы врачебнай амбулатория фельдшера: «Балыыһа кэлэктиибэ махтанар, нэһилиэкпит эр дьонугар. Биир күн түмсэн кэлэн олбуорбутун өрөмүөннүүргэ күүс-көмө буолбуккутугар. Бу ааспыт сайын олбуорбут эргэрэн баҕаналара сууллан хаалбыта онно ыҥырыы таһаарбыппыт тэрилтэ салайааччыларыгар эр дьоннору субуотунньукка ыҥырарга диэн, ону быһа гыммакка кэлэн биир киһи курдук көмөлөөн туттулар. Махтал буоллун мукучубут эр хоһууттарыгар, баҕарабыт чэгиэн доруобуйаны, үлэҕитигэр ситиһиилэри, этэҥҥэ буолууну».
Субуотунньук бүтүүтэ балыыһа үлэһиттэрэ минньигэс аһынан, итии чэйинэн үлэлээбит эр дьону күндүлээтилэр. Инникитин даҕаны маннык үтүө түгэннэр элбэхтик буоллуннар!