Владимир Титович Варламов успуорт саалатыгар сэтинньи 8 күнүгэр тэрилтэлэр икки ардыларыгар 2025 сылы түмүктүүр спартакиада V этаба ыытылынна. Хамаанда аайыттан 6 киһи кытынна.
Ол курдук, чөл олоххо, успуорка, үтүө дьыалаҕа көҕүлүүр сыаллаах ыытылыннылар. Спартакиада бу сырыыга олус сэргэхтик тэрилиннэ. Ааттыын да «Весёлые старты» диэн. Күрэх элбэх түһүмэхтэрдээх: клюшканан мээчиги илдьээһин, теннис мээчиги ыстакааҥҥа кээһии, хайыһарынан хамаанданан хаамыы, обруч хаамтарыы, палканы атахтарыгар кыбынан баран сүүрүү, 2 киһи биир ыстааны кэтэн баран сүүрүү. Дьэ, тыҥааһыннаах киирсиилэр кэннилэриттэн кимнээх хаһыс буолбуттарын сырдатыам. Ол курдук, бүгүҥҥү күрэх бочуоттаах 3 миэстэҕэ тигистилэр — ЖКХ, ДНТ, почта үлэһиттэрин хамаандата. 2 миэстэҕэ — администрация, МПЧ үлэһиттэрин «Чыпчаал» хамаандата. Уонна бу сырыыга иннин биэрбэккэ 1 миэстэҕэ тигистэ Мастаах орто оскуолатын хамаандата «Өркөн».
Кыайыылаахтарга түөскэ кэтиллэр мэтээл, грамота туттарылынна. Уопсай түмүк ахсынньы 6 күнүгэр норуот айымньытын дьиэтигэр буолуоҕа. Онно кыайыылаахтарга көһө сылдьар көмүс кубок туттарыллыаҕа. Махтанабыт куруук чөл олоҕу пропагандалыыр, успуорт көрүҥүн сайыннарар биһиги бөһүөлэккэ үлэлиир успуорт инструкторыгар Айталина Спиридоноваҕа уонна тэрийэр администрация үлэһиттэригэр. Эһиил кэлэр сылга саҥа саҕахтары, саҥа үрдэллэри, дабайыылары баҕара хаалабыт.
Успуордунан дьарыктаныҥ, чөл олоҕу тутуһуҥ, успуорду таптааҥ!
Сардана Жакипова, Мастаах нэһилиэгэ