Мастаах нэһилиэгэр үөрүүлээх быһыыга-майгыга «Катюша» маҕаһыын аһылынна. Бу тэрээһини алҕаан Николай Николаевич Алексеев сиэрин туомун толордо. Маҕаһыыны дьиэтин-уотун ситэрэн-хоторон үлэҕэ киллэрдилэр Надежда, Артём Лепчиковтар. Маҕаһыын хаһаайыттара кыһыл лиэнтэни быһа кырыйан маҕаһыын аһыллыбытын кэрэһилээтилэр. Бу үөрүүгэ кыттыһан кэллиэгэлэрин эҕэрдэлии кэллилэр Мастаах орто оскуолатын математиктар түмсүүлэрэ, «У Ваньки» мини-пекарня үлэһит кыргыттара, ийэтин кытта бииргэ үөрэммит доҕотторо. Маҕаһыын иһэ киэҥ-куоҥ, тупсаҕай көстүүлээх аныгылыы сырдатар уот арааһа ыйаммыт. Маҕаһыын аһыллыбыт үөрүүтүн бэлиэтэ улахан минньигэс туорду кэлбит ыалдьыттарын бука барыларыгар күндүлээтилэр. Киирбит ыалдьыты алаадьынан айах туттулар.
Туорт, тарталеткаҕа салат, фрукта, муорс амсаттылар. Олохтоох дьон эдэр маҕаһыын хаһаайыттарыгар үөрэ-көтө махтаннылар. Бастакы атыылаһааччыга, элбэх суумаҕа атыылаһааччыга диэн соһуччу бириистээхтэрэ дьону үөртэ, сэргэхситтэ. Бөһүөлэкпитигэр «У Ваньки» мини -пекарня бу күн оруобуна үлэлээбиттэрэ 1 сылын томточчу туолла. Эдэр кыргыттарбыт Майя Петрова, Маша Яковлева бу күн элбэх суумаҕа атыыласпыт атыылаһааччыларга розыгрыш оонньотто. Ол курдук, бастакынан Нина Семёнова — 2500 солк., Аксинья Михайлова — 1500 солк., Маргарита Баишева — 1000 солк. асчыт кыргыттартан соһуччу бэлэх туттулар. Кыргыттар хлеб, пицца, хот -дог, бурдук ас, туорт арааһын барытын астыыллар. Ону сэргэ эрдэттэн сакаас ылаллар, бырааһынньыкка эрэ астанар араас омук дэлэй аһын ыал күннээҕи остуолугар үөрэ-көтө дьиэлээхтэрин күндүлүүр.
Асчыт кыргыттарбытыгар санаабыт санаалара толкуйдара туолан олоххо киирэн истин! Эдэр урбааньыт дьоммутугар хаачыстыбалаах аһынан-үөлүнэн хааччыйан дьон-сэргэ махталын ылыҥ, доруобай этэҥҥэ буолуҥ диэн алҕыы хаалабыт. Санаабыттара сатаннын, толкуйдаабыттара тобулуннун, маҕаһыыннарыгар атыы -эргиэн чэчирии сайыннын!
Сардана Жакипова, Мастаах нэһилиэгэ.