Геннадий уонна Давыд Ивановтар — элбэх оҕолоох ыал уолаттара. Кинилэр төрөппүттэрэ Мария Давыдовна уонна Геннадий Васильевич 80 саастарыгар чугаһаабыт ытык кырдьаҕастар буолаллар. Уолаттар бырааттара 2022 сыллаахтан мобилизациянан анал байыаннай дьайыыга сылдьар.
Ивановтар — сахалыы иитиилээх, олус сэмэй ыал. Кинилэр айылҕалыын алтыһан, сир аһын быйаңыттан тиксэн, бултаан-балыктаан олороллор. Ону таһынан, өрүү үтүө санаанан салайтаран, бэйэлэрин нэһилиэктэригэр волонтердуурунан биллэллэр.
Анал байыаннай дьайыыга сылдьар байыастарбыт сууналларыгар-тараналларыгар анаан эмтээх инньэлээх мас (тиит, бэс) лабааларын тыаттан аҕалалларыгар көрдөспүппүтүн, уолаттар тылбытын быһа гыммакка, тута сорунан аҕалбыттара. Ол бэлэми Дьокуускайдааҕы «Илии сылааһа» иистэнэр сыахха ыыппыппыт. Маны тутан ылан, сыах салайааччыта И.Е. Саввина уолаттарга бэйэтин улахан махталын биллэрбитэ.Оттон бүгүн уолаттарбыт ис санааларыттан «Надежда» иис сыаҕар муус тиэйэн аҕалан улаханнык көмөлөстүлэр.
Көмө-тирэх буолар уолаттарбытыгар ис сүрэхтиттэн истиҥник махтанабыт! Эһиги уйан сүрэххит, амарах дууһаҕыт өрүү дьон махталынан туоллун. Доруобай, эйэлээх уонна дьоллоох буолуҥ!
Ираида Софронеева, Кэбээйи улууһа, Куокуй, «Надежда» иистэнэр сыах сырдатааччыта.
Ааптар хаартыскаҕа түһэриитэ.
Ааптар хаартыскаҕа түһэриитэ.