Сииттэбит нэһилиэгэр Кэбээйибит улууһун атын нэһилиэктэрин курдук, быстах байыаннай дьайыыга сылдьар оҕолорбутугар күүс — көмө оҥорорбутун салгыы ыытабыт.
Ол курдук, бу күннэргэ сылаас таҥас — сап, сүүһүнэн собо соркуойданан, бурдук ас арааһа астанан, хомулла турар. Нэһилиэкпит далбар хотуттара үтүө санааннан салайтаралларын толору туоһулаан, үһүс сылларын күүстээхтик көмөлөһө олороллорунан, хас биирдии киһи киэн туттара саарбаҕа суох. Биир дойдулаахтарбытыгар, быстах байыаннай дьайыыга сылдьар оҕолорбут төрөппүттэригэр, бары болҕомтону ууран, ким туох кыахтааҕынан көмө оҥоро олоробут. Онон тустаах дьоммут махталлара улахан.
Билигин тэрилтэннэн собо соркуойдааһына күүстээхтик бара турар. Ол курдук, Сииттэбит саамай улахан коллективтаах, Сииттэ орто оскуолатын үлэһиттэрэ, учууталлара, «Чуораанчык» детсад, олохтоох дьаһалта үлэһиттэрэ, бары ыытыллар үлэлэргэ көхтөөх кыттыыны ыла сылдьалларыттан киһи астына бэлиэтиир.
Бу күннэргэ муҥха үгэнэ буолан, күөх боллох бэрсибит минньигэс соботуттан соркуойдуурга диэн анаан, икки куул собону олохтоох дьаһалтаҕа аҕалан нэһилиэкпит эдэр ыччаттара Василий, Валерий, Иван Сивцевтар туттардылар.
Ити курдук сииттэлэр туохтан да туора турбакка, төһө кыахпыт баарынан Кыайыы туһугар күүс — көмө буола олорорбутунан астынабыт, кыайыыга бүк эрэллээхпит диэн баҕа санаа бастыҥын тиэрдэбит.
Марианна Сивцева