Алтынньы 29 күнэ — Комсомол тѳрѳѳбүт күнэ. Кэбээйи улууһун бочуоттаах олохтооҕо, Корякиннар педагогическай династияларын төрүттээччитэ, Учууталлар учууталлара, Саха Өрөспүүбүлүкэтин бочуоттаах аҕа саастааҕа — Корякина (Слепцова) Евдокия Григорьевна комсомоллаабыт сылларын ахтыытын Сиэгэн-Күөл орто оскуолатын учууталлара бэлэмнээбиттэрин ааҕыҥ.
«Мин, Слепцова Евдокия Григорьевна, 1947 сыллаахха ахсынньы ыйга 6 кылааска үөрэнэ сылдьан комсомолга киирбитим. Классоводпут Елена Георгиевна Капитонова кэпсэтэн, бэлэмнээн киллэрбитэ. Онтон 1961 сылга олунньу ыйыгар бүтэһик взноспун 24 солкуобайы төлөөн, комсомоллаан бүппүтүм. 1958 сылтан комсомольскай тэрилтэҕэ секретардаабытым. Ыал – Уһугар 7 көстөөх сиргэ ынах-сүөһү фермата баара. Бөһүөлэк ыччата үксэ онно үлэлииллэрэ, комсомолга үлэни, сорудахтары Захаров Николай Васильевич, онно үлэлиирэ, толороро. Холкуос бэрэссэдээтэлэ Николай Тимофеевич комсомольскай мунньаҕы биири да көтүппэккэ сылдьара, дьаһайара. Сиэгэҥҥэ баар тэрилтэлэр: оскуола, балыыһа, метеостанция, почта, кулууп, библиотека үлэһиттэрэ, комсомол чилиэннэрэ бөһүөлэк култуурунай олоҕор, ырааһырдыы, бэрээдэк, чөл олох иһин нэһилиэнньэ ортотугар араас үлэни ыытарбыт.
Ол курдук, кулуупка бырааһынньыктарга эрэ буолбакка, кэмиттэн-кэмигэр концертар, постановкалары туруоран көрдөрүүлэр тиһигин быспакка буолаллара, араас күрэхтэһиилэр ыытыллаллара. Эр дьону кытта бииргэ сыал ытыытыгар күрэхтэһэн 50-тан 44 очко ылан кыайан ылбыт Грамотам билигин даҕаны баар. Үчүгэй үлэлээх холкуостаахтары чиэстиирбит. Бырааһынньык аайы оскуолаҕа уопсай уонна кылаастарынан хаһыат таһаарарбыт. Элбэх сыл кулуупка үчүгэйдик, дьон болҕомтотун тардар көстүүлээх хаһыаттары таһаарбыт буолуохтаахпыт. Ол хаһыаттар ис хоһоонноро, ойуулара үчүгэй үлэлээхтэри хайҕааһын, олоххо тахсар мөкү өрүттэри хаарыйыы, кириитикэлээһин ойуулаан көрдөрүү буолара. Комсомол кэккэтигэр сылдьан Сэбээҥҥэ кырдьаҕас табаһыттары ааҕарга, таба ахсаанын сыыппараларынан суруйарга үөрэппитим. Пионерскай лааҕыры арыйаары маҥан таҥаһынан формаларын,уолаттарга ырбаахы, кыргыттарга куота быһан кырыйтаан илиим бааһырыар диэри тикпиппин өйдүүбүн. Сиэгэммэр көһөн кэлэн баран радионан кэмиттэн кэмигэр ааҕыылары ыытарым. Төрөппүттэргэ аналлаахтары, улахан классик суруйааччылар юбилейдарынан сибээстээҕи уо.д.а. Дьахтар комитета тэриллэн үлэлээбитэ. Онно бөһүөлэк эдэр, саастаах да өттүлэрэ хабыллаллара. Тус-туспа арахсан үлэлиирбит — ырааһырдыы, тустаах үлэҕэ сыһыан, бэрээдэк, үлэтэ суохтары кытта үлэ, доруобуйа, оҕо иитиитигэр сыһыаннаах. Маны таһынан табаарыстыы суукка, нэһилиэк депутатынан талыллан үгүстүк үлэлээбит эбиппин.1958 сыллаахха аны олохтоохтор ким да билбэт, харахтаан көрбөтөх тэрилтэлэрин детсады арыйбыппыт. Онно соҕуруу дойдуттан икки тоҥ нуучча кыргыттара кэлиэхтэригэр диэри, дьиэни-уоту, дьиэ малын, таҥаһын-сабын бэлэмнээһин түбүгэ буолбута. Дошкольнай отделениены бүтэрбитим абыраабыта. Төрөппүттэр барахсаттар аҕалыын-ийэлиин тугу эттиҥ да толорон иһэллэрэ. Аҕалар дьиэни-уоту эргэни саҥарда охсон, малы-салы киһи ыйарынан, этэринэн оҥоро охсоллоро. Оннооҕор «Кукольнай угологу» Неустроев Василий оҥорон биэрбитэ. Миигин кытта тэбис-тэҥҥэ Иванова Мария Михайловна, Решетникова (Готовцева) Анна Константиновна сылдьан күнү-күннүктээн сайыны быһа үлэлээн алтынньыга детсад аһыллыбыта. Мин итинтэн ыла детсадка воспитателинэн, бүтэһигин заведующайынан икки сыл үлэлээбитим. Сарсыарда оскуолаҕа саха тылын үөрэтэ-үөрэтэ эбиэт кэннэ детсадка сүүрэрим.
Бэйэм кэммэр биир киһи үлэлиирин үлэлээбитим дэнэбин уонна онтубун олус астына ахтабын-саныыбын, киэн туттабын. Эдэрдэр, оҕолор биһиги курдук үлэлиэхтэрин, хамсаныахтарын баҕарабын. Биһиги оччотооҕу комсомоллар аҕыйах да буолларбыт кыра бөһүөлэк үгүс кыһалҕаларын толуйан, үлэлээн-хамсаан аастахпыт. Кыайбаппыт, сатаабаппыт диэни билбэт этибит. Наада буолла да, оҥоруохтаахпыт, толоруохтаахпыт. Онтон атыны сатаабат гына иитиллибит эбиппит быһыылаах оччотооҕу комсомоллар».