«Ким да умнуллубат, туох да умнуллубат» диэн санаанан салайтаран сылын аайы «Алаһа» эбээлэр кулууптарын салайааччы Васильева Матрена Лазарьевна сиэннэрин кытта Кыайыы скверигэр сибэкки эгэлгэтин олордон көрөр-харайар.
Быйыл эмиэ элбэх сиэдэрэй сибэкки арааһын Кутурҕан күнүн көрсө олортулар. Матрена Лазарьевна бэйэтэ куоракка көрдөрө сылдьар буолан, улахан кыыһа, 10 оҕону иитэ сылдьар Марианна Семеновна, күтүөтэ Иван Васильевич Захаровтар 3 оҕолорун, Сииттэ орто оскуолатын 2, 3, 4 кылаастарын үөрэнээччилэрэ Сайаан Атласов, Миша Кобяков, Алик Махнаткин уонна каникул кэмигэр куораттан Сииттэҕэ сынньана кэлбит,ис сүрэхтэн көмөлөспүт Айыы кыһатын 8 «Б» кылааһын үөрэнээччитэ Дима Егоров, Сииттэ оскуолатын үөрэнээччилэрэ 5 кылаас Никитин Ньургустаан, 7 кылаас үөрэнээччитэ Степа Винокуров, 8 кылаас үөрэнээччитэ Эрчим Ноговицын, оскуола учууталлара Анна Лазарьевна Сивцева, Туяра Александровна Никитина көмөлөстүлэр.
Сыыс оту үргээн, буору көбүтэн, уу кутан Аҕа дойду Улуу сэриитигэр бэйэлэрин харыстаммакка «Барыта фронт туһугар, барыта Кыайыы туһугар» диэн тыыннарын да толук биэрэллэрин кэрэйбэт хорсун буойуттарга, тыылга үлэлээбит бэтэрээннэргэ тыыннаахтар ааттарыттан үйэтитэр сыаллаах ытык иэһи толордулар. Ити курдук кэнчээри ыччаттарбыт аҕа көлүөнэ хорсун быһыытын сүрэхтэригэр чугастык ылынан өрүү өйдүү — саныы сылдьыахтара диэн эрэл кыымы саҕар санааттан астынныбыт, үөрдүбүт.
Анна Сивцева