Куокуй нэһилиэгин Арҕас бөһүөлэгэр Саха сирин Ийэлэрин күнүгэр «ИЙЭБИНЭЭН ЫЛЛЫЫБЫТ» бырааһынньыктааҕы күрэх — бырайыак буолла.
Тэрээһин үөрүүлээх аһыллыыта биһиги ортобутугар олорон ааспыт Герой Ийэлэргэ сүгүрүйэр кэпсээнтэн саҕаланна, бу кэпсээҥҥэ дьүөрэлээн нэһилиэкпит элбэх оҕолоох «Материнская слава» мэтээллээх Күн Күбэй Ийэлэрин Уйгулана Эверстованы, Маргарита Олесованы олохтоох дьаһалта аатыттан В.Д. Гаврильева эҕэрдэлээтэ. Тэрээһин биир үтүө түгэнинэн библиотекаҕа өр кэмҥэ үтүө суобастаахтык үлэлии олорор культура ветерана Спиридонова Варвара Никифоровнаҕа «За вклад в развитие библиотечного дела РС(Я)» бэлиэ туттарылынна.
Бу күн, бырайыак ис хоһоонугар олоҕуран, нэһилиэк биллэр-көстөр, кэрэхсэнэр дьиэ кэргэттэрэ, оҕо — төрөппүт, сиэн-эбээ истиҥ сыһыаннарын, дьиэ кэргэн оҕону кэрэ эйгэҕэ иитиитин, оҕолорунаан сиэннэринээн бииргэ ыллаан арылыччы көрдөрдүлэр.
«Спой со мною, мама» сонун бырайыагы «Луҥха долгуннара», «Өркөн» үҥкүү кэллэктииптэрэ үҥкүүлээн, ыччаттарбыт Кэскил Гуляев, Ярик Кондаков, кэрэ куоластаах Полина Сметанина, Уйгулана Эверстова ыллаан киэргэттилэр. Сырдык эйгэлээх бырайыак ыытыллыытын түгэнигэр байыаннай дьайыы бэтэрээнэ биир дойдулаах уолбут Григорий Иванов көрөөччү буолан олорорун түбэһэ көрөммүт, тэрээһиҥҥэ баар дьон бары сүһүөххэ тураммыт ытыс тыаһынан уруйдаатыбыт.
Күрэх дьүүллүүр сүбэтигэр тумус туттар киһибит СӨ култууратын үтүөлээх үлэһитэ Олесова Н.Е., улууска биллиилээх ырыаһыт Иванова В.П., Куокуй орто оскуолатын социальнай педагога Яковлева А.И. үлэлээтилэр.
Бырайыак кыайыылаахтара:
— Коля, Тамара Гаврильевна Семёновтар — ГРАН- ПРИ, «Көрөөччүлэр биһирэбиллэрэ» анал аат ыллылар.
— I истиэпэннээх лауреаттар — Кирилл, Марк, Рая Платоновна Игнатьевтар
— II истиэпэннээх лауреаттар — Рада, Полина Дмитриевна Сметаниннар
— III истиэпэннээх лауреаттар — Эрсан, Уйгулана Иннокентьевна Эверстовтар
— «Самая дружная команда» анал аат — Дамир, Вадим, Светлана Алексеевна Спиридоновтар
— «За оригинальное исполнение» анал аат — Артём, Дархан, Алена Алексеевна Азаровтар
— » За артистизм и эмоциальность» анал аат — Айыллаана, Ньургуяна Алексеевна Дьяконовтар
ааттаннылар, кыттыбыт дьиэ кэргэттэргэ харчынан бириэмийэлэр олохтоннулар, тэрилтэлэр эҕэрдэлээн туран сэмэй бэлэхтэри туттардылар.
Сметаниннар
Эверстовтар
Азаровтар
Спиридоновтар
Дьяконовтар
Семеновтар
Бу кэрэни бэлэхтэһэр мааны күҥҥэ сылдьыбыт көрөөччүлэр, сонун тэрээһини биһирээбиттэрин эттилэр, кыттааччылар уонна көрөөччүлэр култуура үлэһиттэригэр махтал тылларын тиэртилэр.
Тэрээһин Валентина Иванова, Нина Олесова толорууларыгар «Айыыларга махтаныахха » эҕэрдэ ырыанан түмүктэннэ.Бу курдук, кэрэ умсулҕанынан тулалыыр эйгэбит кэҥии-тэнийэ турдун!
Татьяна Суздалова-Гаврильева, Арҕас бөһүөлэгэ