От ыйын 12-15 күннэригэр Дьокуускай куоракка ыытыллыбыт «Стежка за стенкой, метр за метром» өрөспүүбүлүкэтээҕи иис куонкурсугар Куокуй нэһилиэгиттэн «Надежда» хамаанда (сал. Еремеева И.У.), айан-сырыы уустуктарын аахсыбакка, мотуорунан, салгыы массыынанан айаннаан тиийэн кыттан, сэмэй ситиһиилэннилэр — бэһис инники күөҥҥэ таҕыстылар.
Кыргыттар араас улуус иистэнньэҥнэрин кытта алтыһан, уопут атастаһан, маастарыстыбаларын үрдэтинэн, култуурунай-маассабай тэрээһиҥҥэ сылдьан, остуол оонньуутугар күрэххэ кыттан, сыалларын-соруктарын ситистилэр. Үөрүүлээх быһыыга-майгыга Бочуотунай Грамотанан, Махтал суругунан, иистэнэр массыынанан наҕараадаланнылар. Улууспут социальнай боппуруостарыгар эппиэттээх А. Попова 20000 солк. сертификат туттарда. Байыаннай дьайыы кыттыылааҕа, ыччаппыт, Иннокентий Киренскай дьиэ кэргэнин аатыттан оверлочнай массыына бэлэхтээн, хамаанда үөрүүтүн үрдэттэ. Кураторбыт Антонина Сметанина тус бэйэтин аатыттан сэмэй бэлэҕин тиксэрэн сөхтөрдө. Кыргыттарбытын эгэрдэлиибит!
«Куонкурсу тэрийбит иистэнэр сыах «Илии сылааһыгар» (сал. Саввина И. Е.), өйөөбүт улууспут баһылыгын солбуйааччы А.С. Сивцевка, эдэр кыттааччыбытыгар В. Гуляеваҕа, И. Т. Киренскай дьиэ кэргэнигэр, А. Сметанинаҕа сахалыы сайаҕас махталбытын тиэрдэбит!», — дииллэр «Надежда» кыргыттара.
Улууспутуттан үс хамаанда тэринэн кыттыбытынан астынабыт. Кыайыы көтөллөммүт хамаандаларга барыларыгар эҕэрдэбитин этэбит, киэн туттабыт!
Ираида Софронеева, Куокуй.