Аҕа дойдуну көмүскээччи уонна патриотизм сылынан уонна ону сэргэ Кыайыы 80 сылын көрсө анал дьайыыга сылдьааччыларга суһалга туттарга аналлаах малларын түмэргэ уонна ылыналларыгар көмө хомуйар сыаллаах өрөспүүбүлүкэ оскуола иннинэ үөрэхтээһин тэрилтэлэрин күүһүнэн тэриллибит аһымал аахсыйа Дьокуускай куорат «Россия-Моя история» историческай паркатыгар буолан ааста. Аахсыйаны иилээн-саҕалаан ыыппыт тэрийээччилэринэн буолаллар Дьокуускай куораттааҕы оҕо подростковай киинин тэрийээччи-педагога, Волонтеры Туймаады» уопсастыбанай түмсүү салайааччыта уонна Дьокуускай куорат 23 №-дээх “Цветик-семицветик” оҕону сайыннарар киин сүрүн иитээччитэ.
Тэрээһиҥҥэ кыттыыны ыллылар «Туллук-символ мира и добра» республиканскай бырайыак кыттыылаахтара, ол эбэтэр Уус Алдан, Кэбээйи, Мэҥэ Хаҥалас улуустарын, Дьокуускай куорат уонна куорат чугаһынааҕы нэһилиэктэр уһуйааннара. Тэйиччиттэн олорон аахсыйаҕа Орто Халыма, Таатта, Бүлүү улуустарын уһуйааннара кытыннылар.
Тэрийээччилэртэн уонна уһуйааннартан ураты аахсыйаҕа кыттыыннылар 2-с №-дээх Дьокуускайдааҕы педагогическай колледж, педгогическай институт, ХИФУ устудьуоннара уонна сүрүн көмөлөһөөччүлэр, өйөөччүлэр — төрөппүттэр. Барыта 60 тэрийээччи уонна 200-тэн тахса өйөөччү.
Бу суолталаах, дириҥ ис хоһоонноох тэрээһиҥҥэ Кэбээйи улууһуттан Кэбээйи н. «Мичээр» оҕону сайыннарар киин иитээччилэрэ Ирина Гаврильевна Кобякова уонна Наталья Егоровна Винокурова, Татьяна Давыдовна Максимова салайыытынан баран кыттыыны ылан кэллилэр.
Аахсыйаҕа Норуод фронын бэрэстэбиитэллэрэ Дьокуускай куорат «Лига женщин» тэрилтэ салайааччыта Егорова Татьяна Дмитриевна, оскуола иннинэ үөрэхтээһин салаатын преподавателя Данилова Кыыдаана Егоровна, аҕалара анал дьайыыга сылдьар уонна ини-биилэртэн биирдэстэрэ анал дьайыы бэтэрээнэ ини-бии Поповтар, анал дьайыы бэтэрээнин кэргэнэ Храмова Аина Виссарионовна ыҥырыылаах ыалдьыт буолан кэллилэр.
Хас биирдии кыттааччы уһуйааннар «Туллук-символ мира и добра» бырайыак сүнньүнэн туох үлэни ыыппыттарын отчуоттаатылар, төһө ыйааһыннаах көмө баһыылкалары аҕалбыттарын көрдөрөн туран кэпсээтилэр уонна эҕэрдэ музыкальнай нүөмэрдэрин тириэртилэр. Тэрээһин устата маастар кылаастар ыытылыннылар. Маастар кылаастарга туллуктары, маскировочнай сеткалары тохтоло суох оҥордулар.
Аахсыйаҕа атыы-эргиэн дьаарбаҥката тэрилиннэ, сүүттэриитэ суох лоторея оонньонно. Манна киирбит үп-харчы анал дьайыыга дрон ыларга ананна.
Тэрээһиҥҥэ Кэбээйи «Мичээр» оҕону сайыннарар киинэ, иитиллээччилэр, төрөппүттэр, үлэһиттэр көмөлөрүнэн оҥоһуллубут, түмүллүбүт 24.200 киилэ ыйааһыннаах баһыылкаларын, олунньу 23 күнүнэн анаабыт бэлэхтэрин анал дьайыыга сылдьааччыларга ыытарга анаан туттардылар. Онон Кэбээйилэр анал дьайыыга сылдьааччыларга кырачаан оҕолортон саҕалаан биир санааннан түмсэн көмөлөрүн тириэртилэр.
Татьяна Максимова-Лазарева