Быйыл Аҕа дойду Улуу сылларыгар Чурапчы оройуонун 41 холкуостарын күүс өттүнэн хоту көһөрүү 84 сылын туолла. Балаҕан ыйын 19 күнүгэр Арыылаах биэрэгэр турар 2009 с.(баһ. Сивцев А.С.) Чурапчы көһөрүллүүтүн кыттыылаахтарыгар өйдөбүнньүк аһыллан, сылын аайы бу күн миитин ыытыллар. Бу миитиҥҥэ оскуола үөрэнээччилэрэ, ыччаттар, аҕа саастаах көлүөнэ дьон кыттыыны ылаллар, сибэкки дьөрбөтүн ууран, көһөрүллүү кыттыылаахтарыгар хоолдьуктаах бэйэтин хоҥкуйан ахтан-санаан ааһабыт.
Көһөрүллүү историятын дириҥник үөрэтии оскуолаҕа 2007 сылтан күүскэ ыытыллар. Бу сыллар тухары көһөрүллүү тематыгар араас бырайыактар өйдөбүнньүк кэриэтэ оҥоһуллубуттар. Ол туһунан учууталбыт Анна Лазарьевна бу үлэ ис хоһоонун сиһилии сырдатта. Оскуолаттан тахсыбыт бырайыак билигин бүтүн нэһилиэкпит иһин хабан үлэлиирэ — бу буолар тыыннаахтар ытык иэспит.
Миитиҥҥэ Булуҥҥа Чурапчы Кытаанаҕыттан биэс сааһыгар дьонун кытта барсыбыт Обутова (Собакина) Акулина Ивановна төрөппүт кыыһа, өр сылларга нэһилиэкпит библиотекарынан эҥкилэ суох үлэлээбит, Чурапчыттан сыдьааннаахтар «Утум» түмсүү салайааччыта Обутова Мария Степановна, сиэнэ, нэһилиэкпит баһылыга Тимофеев Семен Тимофеевич, хос сиэнэ, 6-с кылаас үөрэнээччитэ Расулов Демид ийэтин, эбээлэрин туһунан ахтан-санаан аастылар.
Бу өйдөбүнньүк эскиһин технология учууталынан өр сылларга үтүө суобастаахтык үлэлээбит, билигин бочуоттаах сынньалаҥҥа олорор Попов Роман Игнатьевич оҕолорго, ыччаттарга анаан кэс тыл эттэ.Биһиги, 10-с кылаас үөрэнээччилэрэ Ира Гуляева оскуоланы бүтэрбит Сайаан Сивцев эбээтинээн Герасимова Т.В. суруйбут хоһооннорун аахтым. Сивцев Ньургун Көһөрүллүү 80 сылын көрсө суруйбут хоһоонун аахта.
Маннык көрсүһүүлэртэн оҕолор уруккуну ытыктыы, инникини сыаналыы, историяны билэ үөрэнэбит. Төрөөбүт дойдуларыгар төннүбэтэх Чурапчы дьонун чугастык ылынан хараастан кэриэстиибит, кинилэр сырдык ааттарыгар сүгүрүйэбит. Кинилэр үтүө ааттарын үйэтитии тыыннаахтар ытык иэспит буолар.
Чурапчы алдьархайа хаһан да хатыламматын…
Ира Гуляева — В.Е. Колмогоров аатынан Сииттэ орто оскуолатын 10 кылааһын үөрэнээччитэ