Иитээччи күнүн 2016 сыллаахтан Судаарыстабаннай бырааһынньык быһыытынан бигэргэппиттэрэ. Россияҕа Дьиэ кэргэн, Саха сиригэр Оҕо-аймах сыла биллэриллибитинэн быйылгы Уһуйаан иитээччитин, үлэһиттэрин күнэ ураты тыыннаах диэтэхпитинэ сыыспаппыт буолуо.
Ол курдук, Өрөспүүбүлүкэ судаарыстыбыннаһын бэлиэтиир тэрээһини кытары нэһилиэкпит биир тутаах тэрилтэтин, «Ача» оҕо уһуйаанын коллективын эҕэрдэлээтибит. Олохтоох дьаһалта баһылыга Лев Николаевич Павлов оҕо бастакы билиитин уһуйааҥҥа ыларын, манна улахан оруолу иитээччи толорорун тоһоҕолоон бэлиэтээтэ, олохтоох дьаһалта аатыттан сэмэй бэлэхтэри туттартаата. Үөрүүлээх быһыыга-майгыга уһуйаан оҕону иитиигэ-үөрэтиигэ үрдүк көрдөрүүлээх иитээччилэргэ Мария Борисовна Гуляеваҕа, Ньургуяна Алексеевна Дьяконоваҕа Саха республикатын үөрэҕириитин министерствотыттан махтал суруктары туттартаата уонна Рая Платовна Игнатьеваны «Саха республикатын үөрэҕириитин туйгуна» анал бэлиэни ылбытынан эҕэрдэлээтэ. Киэһэлик «Сандалы тула» истиҥ-иһирэх көрсүһүү биэчэрэ ыытылынна. Уһуйаан иитээччилэрин уонна үлэһиттэрин «Угуйаан» культура дьиэтин үлэһиттэрэ эҕэрдэлээтилэр, ылбаҕай ырыаларын бэлэх ууннулар, көрдөөх оонньуулары, сэмэй бэлэхтэри туттардылар.
Убаастабыллаах уһуйаан иитээччилэрэ, үлэһиттэрэ, өр кэмҥэ үлэлээбит ветеран үлэһиттэр, кэлэр кэнчээри ыччат кэскилин түстүүр үлэҕит ситиһиини аҕаллын!
Полина Борисова