П. Д. Степанов аатынан Кэбээйитээҕи кыраайы үөрэтэр түмэлгэ сурукка киирбит олоҥхолоох, II Лүүчүнтэн төрүттээх биир дойдулаахпыт, Кырса Сөдүөт туһунан “Күрүлгэн” сурунаалга тахсыбыт ыстатыйаны хос сиэннэрэ Г. Г. Кобяков аатынан Кэбээйитээҕи модельнай библиотека үлэһитэ Габышева (Павлова) Саргылана Прокопьевна уонна урбаанньыт Петр Прокопьевич Павлов аҕалан туттардылар.
Сурунаал 2024 сыллааҕы 6-с №-гэр физико-математическай наука кандидата, биллиилээх төрүччүнү үөрэтээччи Марк Петрович Григорьев “Олоҥхоһут Кырса Сөдүөт төрдө-ууһа” диэн ыстатыйатыгар Федот Семенович Семенов төрдүн-ууһун, дьонун-сэргэтин туһунан суруллубут.
«1937-1938 сыллардаахха Дьокуускайтан норуот айымньытын хомуйар эспэдииссийэ кыттыылаахтара С. И. Боло, Г. Г. Попов уонна А. А. Савин Кырса Сөдүөт сорох айымньытын суруйбуттара”, — диэн М. П. Григорьев суруйар. Бу ыстатыйаҕа Кырса Сөдүөт төрүччүтэ XVII үйэттэн саҕалаан билиҥҥи кэмҥэ диэри сыдьааннара, хаан аймахтара киирбиттэр.
Бу Кырса Сөдүөт хос сиэннэрэ биэрбит матырыйаалларын түмэлбитигэр баар Олоҥхо хоһугар дьон-сэргэ көрүүтүгэр туруоруохпут.
Айталина Максимова, түмэл үлэһитэ.