СӨ Норуот маастарын күнүгэр «Мичээр» оҕону сайыннарар киин (сэбиэдиссэй М.И. Новгородова) идэлээх сойуустарын (бэрэсэдээтэл М.П. Кобякова) көҕүлээһининэн Кэбээйи нэһилиэгэр «Сэлэлии хаамыы» тэрилиннэ. Бу үтүө суолталаах тэрээһин «Олоҥхо Ыһыаҕар» бэлэмнэнии чэрчитинэн сахалыы таҥаһы көҕүлээн көрдөрөн — тарҕатар сыаллаах -соруктаах ыытылынна.
«Сэлэлии Хаамыыга» кимиэхэ сахалыы тыыннаах тигиилээхтэр, таҥастаахтар, ол эбэтэр олбох, чаппараах, сахалыы сумка тутан, оһуордаах үтүлүк кэтэн хаамтылар. «Мичээрдэр» бүгүҥҥү тэрээһиннэрин өйөөн «Сайдам» норуот айымньытын киинэ (директор Н.И. Полятинская), Култуура сайдыытын киинэ (директор Л.С. Семенова), иистээхтэр «Оһуор тойуга» (салайааччы Е.К. Софронеева), «Күбэйэ» эбээлэр түмсүүлэрэ (салайааччы Т.С. Иванова) сэлэлии хаамтылар. Салгыы П.Д. Степанов аатынан түмэлгэ (директор Г.К. Егоров) нэһилиэк уран тарбахтаахтарын күүһүнэн маастар кылаастар тэриллэн ыытылыннылар.
Бу күн маастар кылаастарга олохтоохтор кырыымпаҕа оонньоотулар, сиэл хаттылар, иистэннилэр, кумааҕыттан эрийэн киэргэл иһит оҥордулар, оҕуруо тистилэр.
Ойуччу сэҥээриини эдэр маастардар бу үлэҕэ кыттыһан ылсан эрэллэрэ буолла. Ол аата илии оҥоһуга, өбүгэ ииһэ сайдан, тэнийэн, дьону-сэргэни хамсатан эрэр эбит.
Кэбээйилэр Олоҥхо ыһыаҕар бэлэмнэниилэрин тиһигин быспакка ыытар былааннаахтар.
Татьяна Максимова-Лазарева